QR Ulttyq ekonomika ministri Rýslan Dálenov Prezidenttik jastar kadrlyq rezerviniń múshelerimen kezdesti, dep habarlaidy QazAqparat.
Ulttyq ekonomika ministri eń aldymen memlekettik organdardyń negizgi qyzmeti týraly jáne Prezidenttiń 2020 jylǵy 1 qyrkúiektegi Qazaqstan halqyna Joldaýyn iske asyrý baǵytyndaǵy basym mindetterge toqtaldy.
«Memleket basshysynyń halyqqa Joldaýynda ekonomikaǵa erekshe mán berilgen. Sonyń ishinde eń mańyzdysy ekonomikany qazirgi jaǵdai talabyna sai damytý. Bul oraida shaǵyn jáne orta biznesten bastap, óndiris saiasaty ekonomikasyn damytýdyń 10 negizgi baǵyty bar. Onyń barlyǵy jańa ekonomikalyq baǵyt bolyp esepteledi», - dedi Rýslan Dálenov.
Sondai-aq, vedomstvo basshysy ministrlik qurylymyn jaqsartý maqsatynda sarapshylar keńesi qurylǵandyǵy jóninde jáne halyq únine qulaq asatyn memleket ideiasyn ilgeriletý týraly sóz qozǵady.
«Biz ministrlikte basqarýshylyq keńesin qurdyq. Onyń quramyna bizden 3 ókil jáne sarapshylar qoǵamynan 3 ókil kirdi. Ondaǵy maqsat – direktorlar, ministrliktiń jaýapty ókilderi sarapshylar keńesi aldynda bizde júrgizilip jatqan reformalar týraly esep berý jáne olardan keri bailanys alý. Osy oraida bizge sarapshylar keńesine prezidenttik jastar kadrlyq rezerviniń múshelerin de tartý ideiasy keldi», - dedi elimizdiń bas ekonomisi.
Ministrdiń aitýynsha, aldaǵy ýaqytta korporativtik basqarýdy jetildirý jáne kvazimemlekettik sektordy reformalaý boiynsha tyń usynystar ázirlenedi.
«Strategiialyq investitsiialyq kelisim jasaýdyń jańa tetikteri engiziledi. Iaǵni investitsiialyq jobalardy iske asyrýda qarjylai jáne qarjysyz qoldaý sharalarynyń biryńǵai paketin usyný degen sóz. Investitsiialyq jobany iske asyrýdyń barlyq kezeńinde zańnamalyq talaptardyń mańyzdylyǵyn umytpaǵan jón», - deidi ol.
Onyń málimdeýinshe, ShOB pen ekonomikanyń basqa da zardap shekken salalaryn qoldaý sharalary jalǵasyn tabady.
«Biznestiń jol kartasy – 2025» memlekettik baǵdarlamasynyń jańa baǵyty aiasynda ShOB-qa berilgen kreditter boiynsha syiaqy mólsherlemesi sýbsidiialanady. Bul sońǵy protsenttik mólsherlemeni jyldyq 6% -ke deiin jetkizedi. Mundai sýbsidiialar tótenshe jaǵdai jariialanǵan sátten bastap 12 ailyq kezeńdi qamtidy», - dedi R. Dálenov.
