QR Ulttyq ekonomika ministri Rýslan Dálenov Memleket basshysynyń óńirlerdi damytýǵa qatysty bergen tapsyrmasyn júzege asyrý josparymen bólisti, dep habarlaidy QazAqparat tilshisi.
«Eldiń óńirlik saiasaty óńirlerdiń básekege qabilettiligin arttyrýǵa jáne turǵylyqty jerine qaramastan halyqtyń ómir súrý sapasyn arttyrýǵa baǵyttalǵan. 2020 jylǵa deiin óńirlerdi damytý memlekettik baǵdarlamasy, «Diplommen aýylǵa» jobasy júzege asyrylyp, «Aýyl - el besigi» baǵdarlamasy ázirlenip jatyr. 2018 jyldan jergilikti ózin ózi basqarýdyń derbes biýdjeti 1 062 aýdandyq mańyzy bar qala men halqy 2 myńnan asatyn aýyldyq okrýgte engizildi. 2020 jyldyń 1 qańtarynan qalǵan 1 334 aýyldyq okrýgte 4 deńgeili biýdjet engizý josparlanyp otyr», - dedi Rýslan Dálenov.
Onyń aitýynsha, jergilikti ózin ózi basqarýdyń derbes biýdjetiniń basty ereksheligi jergilikti máselelerdi sheshýge 7,6 mln azamat tikelei qatysa alady.
«Aǵymdaǵy jyly ministrlik óńirlik damý boiynsha birqatar strategiialyq jáne baǵdarlamalyq qujat ázirledi. Elimizdi aýmaqtyq-keńistiktik damytýdyń 2030 jylǵa deiingi jańa boljamdyq shemasy jasalady. Boljamdyq shema óńirlerdi damytý strategiiasyn aiqyndaidy. Onyń aiasynda óńirlerdi damytýdyń 2030 jylǵa deiingi demografiialyq boljamy ázirlenedi», - dedi vedomstvo basshysy.
Sonymen qatar, ministr óńirlerdegi ómir súrý sapasyn qamtamasyz etýdiń óńirlik standarttary engiziletindigin atap ótti.
«Óńirlerdi damytýdyń 2025 jylǵa deiinngi jańa memlekettik baǵdarlamasy ázirlenetin bolady. Ol qalalyq aýdandarda, mono jáne shaǵyn qalalardy, tirek aýyldarda infraqurylymdardy damytý arqyly halyqtyń ómir súrý sapasyn jaqsartýǵa baǵyttalady. Buǵan qatar keleshegi bar mono jáne shaǵyn qalalardy, aýyldardy, ásirese tirek aýyldar men shekara mańyndaǵy eldi mekenderdi damytý boiynsha sharalar jalǵasyn tabady», - dedi ol.
Ministr óńirlerdi abattandyrý, halyqty aýyz sýmen jáne sý tartý qyzmetimen tiimdi jáne únemdi qamtamasyz etý mindeti sheshilip, jalpy turǵyn úi-kommýnaldyq sharýashylyq ahýaly jaqsartylatyndyǵyn basa aitty.
«Óńirlerdi 2025 jylǵa deiingi damytýdyń memlekettik baǵdarlamasynyń qortyndysynda ortalyqtandyrylǵan sýmen jabdyqtaý júiesine qol jetkizý artady. 4385 shaqyrym sýmen jabdyqtaý jáne 616 shaqyrym sý tartý jelisin salk josparlanǵan. Aǵymdaǵy jyly aýmaqtardy damytý baǵdarlamasynyń formaty ózgertilip, jeńildetiledi. Iri qalalardy damytýdyń 2050 jylǵa deiingi uzaqmerzimdik strategiiasy men Shymkent jáne Semei qalalaryn áleýmettik-ekonomikalyq damytýdyń keshendi jospary ázirlenedi», - dedi Rýslan Dálenov.
Sonymen qatar, ol «Aýyl - El besigi» jobasy boiynsha keleshegi zor aýyldarda áleýmettik, injenerlik infraqurylym nysandaryn jóndeý, salý jáne qaita qurý maqsatty túrde oryndalatyndyǵyn atap ótti.
Eske sala keteiik, 12 maýsymda ótken ulyqtaý rásimi barysynda Qasym-Jomart Toqaev on mańyzdy baǵytyn jariialaǵan bolatyn.
