Parlament Májilisiniń jalpy otyrysynda Ulttyq ekonomika ministri Rýslan Dálenov 2020 jylǵa arnalǵan naqtylanǵan áleýmettik-ekonomikalyq damý boljamyn tanystyrdy, dep habarlaidy QazAqparat.
Boljamdy naqtylaýynyn negizgi faktorlary mynalar: bul – 2019 jylǵy jalpy ishki ónim boiynsha ózektendirilgen eseptik derekter, aǵymdaǵy jyldyń basynan bergi jedel derekter, munai óndirýdiń josparyn túzetý, sondai-aq álemdik naryqtaǵy munaidyń baǵalanýy.
«Iaǵni, 2019 jylǵy ózektendirilgen jalpy ishki ónim kólemi 0,9 trln teńgege artyp, 69,5 trln teńgeni qurady. Bul aǵymdaǵy jylǵy boljamdy esepteý bazasyn ulǵaitty. Sonymen birge, boljamda ekonomikanyń naqty sektoryndaǵy, qyzmet kórsetý salasyndaǵy úrdisteri men munai baǵasynyń koniýnktýrasy eskerildi. Álemdik ekonomika ósimi Halyqaralyq uiymdardyń konsensýs-boljamy boiynsha aǵymdaǵy jyly minýs 5 paiyzdy quraidy, al 2021 jylda ósim kútilýde», - dedi ministr.
Onyń sózine qaraǵanda, halyqaralyq uiymdar Qazaqstan ekonomikasynyń naqty ósimin biylǵy minýs 2,3 paiyzdan minýs 2 paiyz aralyǵynda baǵalaidy. Kelesi jylǵa turaqty ósimdi boljap otyr.
«Ekonomika sektorlarynyń aǵymdaǵy úrdisterin eskere otyryp, bizdiń baǵalaýymyz boiynsha, 2020 jylǵy naqty jalpy ishki ónimniń ósimi minýs 2,1 paiyzdy quraidy. 2020 jyly nominaldy jalpy ishki ónim 69,8 trln teńge kóleminde baǵalanýda. Ol buryn naqtylanǵan kórsetkishten 102 mlrd teńgege joǵary. Bul 2019 jylǵy bazalyq kórsetkishterdiń ósýimen bailanysty», - dedi R. Dálenov.
«Munaidyń eseptik baǵasyn eskere otyryp, boljamdyq baǵany 20 dollardan 40 dollarǵa deiin arttyrý usynylady. Qańtar-qyrkúiekte munaidyń ortasha baǵasy bir barrelge 42 dollardy qurady. Naqtylanǵan jospar boiynsha munai óndirý kólemi 85 mln tonnany quraidy. Taýarlar eksporty 45,5 mlrd dollarǵa deiin artady, import 33,8 mlrd dollardy quraidy. Osylaisha, oń saýda teńgerimi 3,2 mlrd-qa ulǵaiyp, 11,7 mlrd dollar kóleminde boljanýda», - dedi vedomstvo basshysy.
