Rýmyniiada koronavirýs infektsiiasyn emdeýge arnalǵan aýrýhanada órt bolyp, 10 adam qaza tapty. Taǵy birneshe naýqas qatty jaraqat aldy, dep habarlaidy BBC agenttigi.
Tilsiz jaý soltústik-shyǵystaǵy Piatra-Niamts qalasyndaǵy memlekettik aýrýhananyń qarqyndy terapiia bólimin jalmaǵan.
Naýqastardy qutqarmaq bolǵan kezekshi dárigerdiń denesin kúiik shalyp, aýyr hálde jatyr.
Rýmyniia Densaýlyq saqtaý ministri Nelý Tetarýdyń jergilikti BAQ-qa bergen málimeti boiynsha, órtke «elektr symdarynyń qysqa tuiyqtalýy sebep bolýy múmkin».
Sondai-aq ministr Tetarý koronavirýsqa qarsy em alyp jatqan basqa naýqastardy Iassy qalasyndaǵy basqa mekemege aýystyratynyn atap ótti.
Jergilikti BAQ habarlaýynsha, denesin qatty kúiik shalǵan kezekshi dáriger áskeri ushaqpen el astanasyna jetkizilgen.
«Jaraqat alǵan basqa da meditsina qyzmetkerleri bar» dep atap ótti Tetarý. Sondai-aq ol senbi kúni keshke aýrýhanada bolǵan jaǵdaidan keiin Piatra-Niamtske bara jatqanyn aitty.
Segiz naýqas ekinshi qabattaǵy órt paida bolǵan bólimshede mert bolǵan, al ekeýi janyndaǵy palatada kóz jumdy. Barlyǵy koronavirýstan em alyp jatqan. Palatadaǵylardyń kóbi ókpeni jasandy jeldetý qurylǵysyna qosylǵan.
Densaýlyq saqtaý ministrliginiń málimetinshe, naýqastardy intýbatsiialaýǵa paidalanylatyn ottegi túskennen keiin qyzyl jalyn tez tarap ketken degen boljam bar.
Pandemiia bastalǵaly Rýmyniiada 350 000 koronavirýs juqtyrý oqiǵasy tirkeldi, 8813 adam kóz jumdy. Juma kúni elde 9 489 adamnyń koronavirýsqa shaldyqqany belgili bop, 174 adam ómirden ótti. 1 149 naýqas qarqyndy terapiia bólimshelerinde em alyp jatyr.
