Búgin QR Prezidenti janyndaǵy Ortalyq kommýnikatsiialar qyzmetinde halyqaralyq «Slavianskii bazar-2021» óner festivaliniń gran-pri júldesiniń iegeri Rýhiia Baidúkenovanyń qatysýymen baspasóz otyrysy ótti, dep habarlaidy "Ult aqparat" «Habar» agenttiginiń baspasóz qyzmetine silteme jasap.
XXX-shy dástúrli Halyqaralyq óner baiqaýy biyl 14-19-shy shilde aralyǵynda Belarýs eliniń Vitebsk qalasynda ótti. Qazaqstandyq delegatsiia dúbirli dodadan elge búgin túnde oraldy.
Qazaqstan Respýblikasynyń Mádeniet jáne sport ministrligi Rýhiia Baidúkenovanyń halyqaralyq arenada Qazaqstannyń laiyqty ókili bolýy úshin qoldaý kórsetse, «Habar» Agenttigi «Slavian bazary - 2021» Halyqaralyq óner festivalin taratý quqyǵyna ie bas aqparattyq seriktesi boldy.
«Qazaq elin bul jeńispen quttyqtaimyn. Biz aqparattyq demeýshiligimizdi festivaldiń ashylý, jabylý saltanatty rásimderin kórsetý arqyly, «Habar», «Habar 24» arnalaryndaǵy jańalyqtarda halyqqa Rýhiianyń jeńisi týraly aqparatty taratý arqyly barynsha qoldaý bildirýge tyrystyq. Elimizdiń jas talanttaryn «Habar» Agenttigi qashan da qoldap keledi»,- dedi «Habar» telearnasynyń direktory Dinara Bisembina baspasóz otyrysynda.
30 eldiń ókilderi baq synasqan baiqaýdyń qazylar alqasy men uiymdastyrýshylary, biylǵy qatysýshylar arasynda básekelestiktiń asa joǵary bolǵanyn alǵa tartady. Ekinshi týrda ánshiler slavian ánderin Belarýs eliniń bas dirijeri Vitalii Kýlbakovtyń basshylyǵymen oryndaǵan.
Birinshi konkýrstyq kúnnen keiin Rýhiia Baidúkenova 70 baldan 69 upai jinady. Qazylar alqasynyń reseilik múshesi Sergei Penkin qazaqstandyq oryndaýshyǵa 9 upai berse, qalǵan barlyq múshesi 10 upaidan bergen.
«Árine, baiqaýda qobaljý boldy, biraq men ánimdi halyqqa jetkizýge tyrystym. Elimniń abyroiyn asqaqtatý meniń mindetim dep sanadym. Qazaq eline úlken raqmet! Meniń armanym oryndalyp jatyr. Jeńisimdi halyqpen birge toilaý - bala kúngi armanym edi. Bul - meniń ǵana emes, búkil Qazaqstannyń jeńisi dep bilemin», - dedi «Slavian bazary-2021» halyqaralyq óner festivaliniń bas júldegeri Rýhiia Baidúkenova.
Tartysty ótken baiqaýda bas júldeni qazaq qyzy Rýhiia Baidúkenova jeńip aldy. Birinshi oryn serb qyzy Irina Arsenievichke buiyrsa, ekinshi oryndy ýkrainalyq Renata Shtifel men Daniil Myshkovets aldy. Úzdik úshtikti slovak Ivanna men Ázirbaijan ókili Tofiek Gadjiev qorytyndylaǵan. Al, baiqaýdyń arnaiy syilyǵy – «Slavian úmiti» serbiialyq Irina Arsienevichke buiyrdy.
Sondai-aq, biyl qazylar alqasynyń músheleri arasynda Dimash Qudaibergen de boldy, ol 2015 jyly «Slavian bazarynyń» bas júldesin jeńip alǵan edi.
Aita keteiik, 22 jasar Rýhiia Baidúkenova Taldyqorǵan qalasynyń týmasy. Ol bala kezinen vokalmen ainalysqan. Qazirgi tańda Qazaq ulttyq óner ýniversitetiniń «estradalyq vokal» mamandyǵynyń úshinshi kýrs stýdenti. Jas ánshi 2014 jyly «Jas qanat» respýblikalyq jas oryndaýshylar baiqaýynyń finalisti atansa, 2015 jyly «Zvezdy Evrazii» (Eýraziia juldyzdary) jáne «Golos Astany» (Astana daýysy) halyqaralyq baiqaýlarynda birinshi oryndy ielengen. Daýys diapazonynyń keńdigi bes oktavany quraidy.
