«Rýhani jańǵyrý» baǵdarlamasy aiasynda halyqtyń jas erekshelikterine sai arnaiy jobalar ázirlenedi. Bul týraly halyqqa esep berý kezdesýinde QR Aqparat jáne qoǵamdyq damý ministri Aida Balaeva aitty, dep habarlaidy "Ult aqparat".
«Ministrliktiń quzyryndaǵy taǵy bir mańyzdy ideologiialyq baǵyt – qoǵamdyq sanany jańǵyrtý salasy. Árine, rýhaniiat baǵytyndaǵy jumystyń nátijesi birden kórinbeitini belgili. Onyń ishinde qoǵamdyq sanany jańǵyrtý – úlken eńbekti, uzaq merzimdi talap etedi. Degenmen, qol jetkizgen nátijeler joq emes. Tuńǵysh Prezident – Elbasymyzdyń tarihi maqalasynan bastaý alǵan baǵdarlama boiynsha búginde 17 arnaiy joba júzege asyp jatyr. Jyl basynan beri 3 millionnan astam halyqty qamtyǵan 13 myńnan artyq is-shara ótkizildi», - dedi Aida Balaeva.
Onyń atap ótýinshe, ár jobanyń óz orny men aýditoriiasy bar. Degenmen olardyń arasynda «Týǵan jer», «100 jańa esim», «Kieli Qazaqstan», «100 jańa oqýlyq» «Eńbek – eldiń muraty», «Únem – qoǵam qýaty» jobalaryn erekshe ataýǵa bolady.
«Baǵdarlamanyń basty maqsaty – jańa sapadaǵy qoǵamdyq sana qalyptastyrý. Bul rette, biyldan bastap «Rýhani jańǵyrý» baǵdarlamasyn – Ulttyq jańǵyrý kezeńine ótkizý qolǵa alyndy. Baǵdarlamany halyqtyń jas erekshelikterine sai toptap, ár maqsatty topqa – arnaiy jobalar ázirlenedi. Onyń ishinde, ásirese mektepke deiingi jáne mektep jasyndaǵy býynǵa basty kóńil bólinetin bolady», - dedi ministr.
