"Rýhani jańǵyrý" qazaqstandyq qoǵamdyq damý institýtynda "erte nekeler" áleýmettik zertteý nátijelerin talqylaý boiynsha dóńgelek ústel ótti. Oǵan Aqparat jáne qoǵamdyq damý ministrligi Jastar jáne otbasy isteri komitetiniń tóraǵasy, halyqaralyq jáne ulttyq sarapshylar, ÚEU ókilderi, qoǵam qairatkerleri, pedagogtar qatysty. Bul týraly aqparat jáne qoǵamdyq damý ministrligi habarlady, - dep habarlaidy «Ult» portaly.
Resmi aqparatqa sáikes, "Rýhani jańǵyrý" baǵdarlamasy aiasynda otbasy institýtyn zertteý ortalyǵy 2020 jyldaǵy zertteý qorytyndylaryn tanystyrdy. Zertteý Nur-Sultan, Almaty, Qaraǵandy, Shymkent qalalarynda, Almaty, Mańǵystaý jáne Túrkistan oblystarynda júrgizildi.
Osy másele boiynsha QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń múshesi, "shyǵarmashylyq intelligentsiia áielderi ligasy" qoǵamdyq birlestiginiń basqarma tóraǵasy A. Ý. Hairýllina óz oiyn aitty. Sonymen qatar jiynǵa Sofiia ýniversitetiniń jattyqtyrýshy-mediatory, saiasattaný professory T. A. Dronzina qatysyp, tájiribesinen mysaldar keltirdi.
Qyrǵyz Respýblikasyndaǵy IýNISEF genderlik saiasat jónindegi mamany N. Sýiýnalieva, jynystyq jáne reprodýktivti densaýlyq jónindegi qazaqstandyq qaýymdastyqtyń atqarýshy direktory, akýsher-ginekolog G. A. Grebennikova qatysyp tájiribesin bólisti.
Olardyń aitynsha, erte nekege turý qyzdardyń ómirine, ana men balanyń fizikalyq jáne psihologiialyq densaýlyǵyna teris áser etedi. Kóp jaǵdaida otbasylyq qolaisyzdyqtar men ajyrasýlarǵa ákeledi.
Talqylaý qorytyndysy boiynsha qatysýshylar erte nekelerdiń der kezinde aldyn alý, konsýltativtik kómek, bilim alý, zorlyq-zombylyqtan qorǵaý tetikterin jáne t. b. alýǵa qoljetimdilikti qamtamasyz etý boiynsha sharalar qabyldaýdyń mańyzdylyǵy men qajettiligin atap ótti.
Sonymen qatar Almatyda daǵdarysqa tap bolǵan jas otbasylarǵa arnalǵan 5 senim kabineti ashyldy. Bul da osy baǵdarlama aiasynda júzege asyp jatyr.
Jobanyń negizgi maqsaty – otbasy institýtyn nyǵaitý jáne megapolistegi turmystyq zorlyq-zombylyqtyń aldyn alý.
Aita keteiik, Memleket basshysy Qazaqstan halqyna Joldaýynda otbasylyq saiasatty damytý máseleleri boiynsha jumystardy kúsheitýdi tapsyrdy.
«Otbasy – qoǵamnyń negizgi áleýmettik institýty. Osylaisha, otbasy problemalary qazaqstandyq qoǵam ómiriniń barlyq basqa salalaryna teris áser etedi», - deidi Almaty qalasy ákimdiginiń baspasóz qyzmeti.
Senim kabinetteriniń ashylý saltanatyna qala ákimdigi, sot ókilderi jáne qala jastary qatysty.
Bul senim kabinetteri jas otbasylardaǵy bereke men birlikti saqtaý maqsatynda sanitarlyq-epidemiologiialyq normalardy qatań saqtai otyryp, face to face formatynda jáne onlain-rejimde jumys isteidi.
