«Rýhani jańǵyrý» baǵdarlamasynyń birtutas aqparattyq júiesi qalyptastyryldy. Bul týraly Aqordada ótken Qoǵamdyq sanany jańǵyrtý jónindegi ulttyq komissiia otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«El Prezidenti Qasym-Jomart Kemeluly atap ótkendei, qazirgi tańda «Rýhani jańǵyrý» baǵdarlamasynyń memlekettik ideologiianyń mańyzdy baǵyty retinde qajettiliginde qoǵam tarapynan da, memleket tarapynan da kúmán joq. Ózderińiz bilesizder, osy ýaqytqa deiin 6 baǵyt boiynsha 13 joba bekitilip, olardyń aiasynda 10 myńnan astam is-shara ótti. Árine, bul jerde biz úshin mańyzdysy – san emes, sapa. Óitkeni, tájiribe kórsetkendei, keibir jerlerde eseptilik, naýqanshylyq siiaqty úrdister oryn alǵany jasyryn emes. Bul týraly Elbasymyz da naqtylap aitqan bolatyn», - dedi ministr.
Osyǵan orai ol óńirlerdegi barlyq is-sharalarǵa qaita taldaý jasalyp, rýhani jańǵyrýǵa qatysy joqtarynyń qysqartylǵanyn atap ótti. Máselen, byltyrǵy jyldyń josparynda 229 is-shara kózdelgen bolsa, biyl barlyǵy 97 tarmaq qana qaldyryldy.
Sonymen qatar Aida Balaeva otyrysta Aqparat jáne qoǵamdyq damý ministrligi quzyretindegi jumystarǵa qysqasha toqtaldy.
«Búgingidei aqparattyq zamanda kez kelgen bastamanyń baiandylyǵy elge jóni durys, qoly jetimdi, kózge kórkem aqparat berýge bailanysty. Sondyqtan da, eń aldymen baǵdarlamanyń birtutas aqparattyq júiesi qalyptastyryldy. Onyń negizgi quraly retinde arnaiy «RRuh.kz» biryńǵai internet-portaly, «Azamattyq alań» pikirtalas ortalyǵy men respýblikalyq BAQ jáne áleýmettik jelilerde jumys júrgizetin baspasóz qyzmeti quryldy. Osynyń arqasynda bir ǵana 2020 jyldyń ishinde bul baǵytta uzyn sany 19 myńnan astam aqparattyq material jariialandy. Sonyń ishinde, qazaqstandyqtardyń 70 paiyzy internet jelisinde otyratyndyǵyn eskere kele, onyń 15 myńnan astamy internet pen áleýmettik mediada kórinis tapty. Árine, bul rette iri media-jobalardyń orny bólek. Osy oraida, otandyq telekanal ekrandarynan jyl basynan beri 29 derekti film, 122 arnaiy baǵdarlama, 142 tanymdyq rolikter toptamasy kórsetildi», - dedi ol.
Ministrdiń aitýynsha, sonyń nátijesinde turaqty aqparattyq fon qalyptasyp, baǵdarlamaǵa degen eldiń nazary arta tústi.
«Áleýmettik zertteýler kórsetkendei, «Rýhani jańǵyrý» týraly osy kúni halyqtyń 80,7 paiyz habardar bolsa, 32,6 paiyz azamattarymyz baǵdarlama jumysymen tikelei qamtylǵan», - dedi Aida Balaeva.
