«Rýhani jańǵyrý» baǵdarlamasyn júzege asyrýda basty basymdyq balalar men jastarǵa beriledi. Bul týraly Aqordada ótken Qoǵamdyq sanany jańǵyrtý jónindegi ulttyq komissiia otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Kelip túsken usynystar eskerilip, 2021 jylǵy respýblikalyq jospar jinaqtalyp jatyr. Olardyń barlyǵyn birdei tizip otyrmai, basty tujyrymdamalyq baǵyttaryna nazar aýdaraiyn. Eń birinshi másele – bul is-sharalar burynǵydai jalpyhalyqtyq sipatta emes, jas erekshelikterine orai, ár toptyń rýhani qajettiligin eskere otyryp, maqsatty ári ataýly túrde júzege asyrýǵa negizdelgen. Sonyń ishinde, basty basymdyq balalar men jastarǵa berilip otyr. Kelesi bir erekshelik – olardyń barlyǵy, qurmetti Qyrymbek Eleýuly, ózińizdiń maqalańyzda kórsetilgen ult úshin asa mańyzdy úsh murat – bilim, densaýlyq jáne eńbek ainalasyndaǵy is-sharalar kesheninen qalyptasatyn bolady», - dedi ministr Memlekettik hatshy Qyrymbek Kósherbaevqa qarata.
Mysaly, ministrdiń aitýynsha, olardyń qatarynda básekege qabiletti, jan-jaqty damyǵan jas urpaqty qalyptastyrýǵa arnalǵan «Ulttyq tárbie», jastardyń ǵylymi jetistikteri týraly «Aqyldy urpaq», eńbek adamy bolýǵa shaqyrǵan «Proforientatsiia», kitap oqityn jastardyń sanyn arttyrý, joǵary estetikalyq talǵamyn qalyptastyrý, bos ýaqytty tiimdi josparlaý siiaqty is-sharalar qamtylǵan «Tárbie-tanym» jobalary bar.
Eske sala keteiik, Memlekettik hatshy Qyrymbek Kósherbaevtyń tóraǵalyǵymen ótken komissiia otyrysynda «Rýhani jańǵyrý» baǵdarlamasyn odan ári tereńdetip Ulttyq jańǵyrý kezeńine ótkizýdiń arnaiy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategiialyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhani-adamgershilik jáne patriottyq tárbie berý, Eńbek adamyn qalyptastyrý, Aýyldy túletý siiaqty t.b keshendi is-sharalar qamtylady. Memlekettik hatshy otyrysty qorytyndylai kele, «Rýhani jańǵyrý» baǵdarlamasynyń basym baǵyttary boiynsha jumysty odan ári jandandyrý boiynsha naqty tapsyrmalar berdi.
.jpeg)