Búgin Almaty oblysynyń ákimi Amandyq Batalov Memleket basshysy Nursultan Ábishuly Nazarbaevtyń tóraǵalyǵymen óńirlerdiń áleýmettik-ekonomikalyq damýy men memlekettik baǵdarlamalardy júzege asyrý máseleleri taqyrybynda ótkizgen jiynynda talqylanǵan máselelerge qatysty jumystardy júielep alý maqsatynda aýdan jáne qala ákimderimen qatar oblystyq basqarmalar men departamentterdiń basshylaryn shaqyryp, jiyn ótkizdi, - dep habarlaidy Almaty oblysy ákiminiń baspasóz qyzmeti.
Jiyn barysynda oblys ákimi Amandyq Batalov shaqyrylǵan azamattarǵa birneshe tapsyrma berdi.
- Biylǵy jyldyń ótken 7 aiynyń áleýmettik-ekonomikalyq damý qorytyndysy shyǵaryldy. Bizdiń aldymyzda birneshe mańyzdy tapsyrmalar tur. Memlekettik «Nurly jer» jáne «Nurly jol» baǵdarlamalarynyń oryndalýy Elbasynyń erekshe baqylaýynda. Sol sebepti, osy jáne ózge de baǵyttar boiynsha jumystardy qarqyndy júrgizý qajet. Memlekettik-jekemenshik áriptestik mehanizmderin qoldaný máselelesindegi, sonyń ishinde densaýlyq saqtaý salasynda osy mehanizmdi qoldanýda belsendi jumystar júrgizýimiz kerek. Óńirge investitsiia tartý da erekshe nazarda. Sondyqtan da, aýdan, qala ákimderi men basqarma jáne departament basshylaryna osy atalǵan tapsyrmalardy oryndaýda úlken jaýapkershilik tanytýyn suraimyn. Atalǵan baǵyttardyń oryndalýy árbirińizdiń atqarǵan jumystaryńyzdyń aiqyn kórsetkishi bolyp tabylady, - dedi óńir basshysy.
Jiyn barysynda oblys ákimi «Rýhani jańǵyrý» baǵdarlamasyn oryndaýǵa erekshe nazar aýdarý qajettigin de atap ótti.
Amandyq Ǵabbasuly oblystyq ishki saiasat basqarmasynyń basshysy men osy salaǵa jetekshilik etetin ákim orynbasaryna:
- Oblysta «Rýhani jańǵyrý» baǵdarlamasyn iske asyrý baǵytyndaǵy qolǵa alynǵan jumystardy kúsheitý qajet. Bizde kóp múmkinshilikter bar, alaida belsendilik tanytý jaǵy aqsap tur. Istelip jatqan jumystaryńyzda naqtylyq baiqalmaidy. Jańasha kózqaraspen qarap, tiisti sharalar qabyldańyzdar, - dei kele, «Rýhani jańǵyrý» baǵdarlamasyn júzege asyrý maqsatynda arnaiy ashylǵan Taldyqorǵan qalasyndaǵy oblystyq jobalyq keńse jumysyn qaita qarap shyǵýdy tapsyrdy.
