Almatyda «Rýhani jańǵyrý» baǵdarlamasyn iske asyrý josparyna sáikes, 2020 jyly 200 joba qolǵa alyndy. Soǵan bailanysty 211 is-shara ótedi. Bul týraly Almaty qalasy boiynsha «Rýhani jańǵyrý» jobalyq keńsesiniń basshysy Gúlnar Qońyrova málimdedi. Tolyǵyraq «Ult» portaly taratyp jazady.
Aitýynsha, 2020 jyly IýNESKO-nyń kúntizbesine shyǵys oishyly Ábý Nasyr ál-Farabidiń 1150 jyldyǵy men Abai Qunanbaiulynyń 175 jyldyǵy engizildi. Osyǵan bailanysty, josparǵa qosymsha 38 shara qosyldy.
Onyń ishinde Abai Street Fest ashyq aspan astyndaǵy festivaldiń qoiylymy, onyń aiasynda «Jelsiz túnde jaryq ai» taqyrybynda «Mýzeidegi tún» aktsiiasy, «Abai weekend» festivali, Farabi World jas ǵalymdar forýmy jáne ál-Farabidiń mereitoiyna arnalǵan halyqaralyq konferentsiiany ótkizý josparlanyp otyr. Sonymen qatar Almatyda Jetisý aýdanynda Abaidyń músini ornatyldy.
Baǵdarlama aiasynda «Jańa gýmanitarlyq bilim: qazaq tilindegi 100 jańa oqýlyq» arnaiy jobasyn júzege asyrý aiasynda Almatyda joǵary oqý oryndaryna 7 oqýlyq pen oqý quralyn aýdarýǵa jáne shyǵarý bastamasy kóterildi. Aita ketý kerek, bul bastapqyda josparlanǵan júz kitaptyń ishine kirmeidi.
Sonymen qatar «Rýhani jańǵyrý» baǵdarlamalyq maqala jariialanǵanyna úsh jyl tolýyna orai joǵary oqý oryndary úshin «Rýhani jańǵyrýdy taný negizderi» kontseptýaldy oqýlyǵyn basyp shyǵarý josparlanyp otyr. Osy oraida ultty rýhani, mádeni turǵydan damytý jáne halyqaralyq ustanym boiynsha «Jahandyq álemdegi qazaqstandyq zamanaýi mádeniet» ataýymen arnaiy jobanyń asa mańyzdy bolǵanyn aita ketken jón.
Qaladaǵy eki júz jobanyń ishinde mýzykalyq murany dáripteý de shet qalmady. Osy salany ári qarai damytý úshin jáne túrli eldermen shyǵarmashylyq bailanystaryn keńeitý maqsatynda halyqaralyq festivalder ótkizý jospary bar. Bul bólim «Qazaqstannyń kieli kartasy» jobasyn iske asyrýdy qamtidy.
Sondai-aq, biyl da arheologiialyq murajai keshenderin, ashyq aspan astyndaǵy murajailardy qurý boiynsha jumys qarqyn alady. Almatyda dala folklory men mýzykasyn tanymal etý maqsatynda Sazgen-sazy folklorlyq-etnografiialyq ansambliniń Sankt-Peterbýrgke, sondai-aq qýyrshaqtar teatrynyń Polsha men Bolgariiaǵa arnalǵan halyqaralyq festivalge sheteldik gastrolderi josparlanǵan.
Buǵan qosa, «Boraldai saq qorǵandary» arheologiialyq parkinde qazaq jáne búkil túrki áleminiń tarihi, mádeni murasyn kópshilikke taratý úshin «Uly dala — kóshpendiler álemi» halyqaralyq etnografiialyq festivali ótedi.
Aitýynsha, qazaq ádebi murasyn nasihattaý maqsatynda úshinshi ret halyqaralyq jazýshylar forýmy ótedi dep josparlanyp otyr. Ol jerge qazir álemde tanylyp jatqan jazýshylar qatysady.
«Týǵan jer» arnaiy jobasy aiasynda týǵan jerge, onyń mádenietine, ádet-ǵurpyna, dástúrlerine erekshe kóńil bólinedi. Sol arqyly patriottyq sezimdi oiatýǵa bastama bolady.
Aita keteiik, «Rýhani jańǵyrý» baǵdarlamasyn iske asyrýǵa qala turǵyndarynyń barlyǵy atsalysady. Atap aitar bolsaq, stýdentter men oqýshylar, bilim berý jáne mádeniet qyzmetkerleri, halyqtyń áleýmettik osal toptary, qart adamdar, jastar, ózin-ózi jumyspen qamtyǵandarda bul tizimde bar. Sonymen qatar áleýmettik mańyzy bar jobalar sany artatyn bolady.
