Otyrysqa Parlament depýtattary, memlekettik organdardyń basshylary, Assambleia músheleri, respýblikalyq jáne óńirlik etnomádeni birlestikterdiń ókilderi, óńirlik assambleialar hatshylyqtarynyń meńgerýshileri men QHA Ǵylymi-saraptamalyq keńesiniń músheleri qatysty.
Memlekettik hatshy óz sózinde Nursultan Nazarbaevtyń tapsyrmasy boiynsha Qazaqstanda ekonomikany, saiasat pen qoǵamdyq sanany qamtityn júieli ári aýqymdy jańǵyrtý bastalyp ketkenin atap ótti.
– Qoǵamdyq sanany jańǵyrtýǵa baǵyttalǵan «Rýhani jańǵyrý» baǵdarlamasy Assambleia jumysyna tyń serpin berdi, – dedi G.Ábdiqalyqova.
Memlekettik hatshy «Týǵan jer», «Qazaqstannyń kieli jerleriniń geografiiasy», «Jahandaǵy zamanaýi qazaqstandyq mádeniet», memlekettik tildi latyn grafikasyna kóshirý jónindegi jobalardy iske asyrýǵa barlyq etnomádeni birlestiktiń atsalysýy kerek ekenine nazar aýdardy.
G.Ábdiqalyqova elimizde 1 338 etnomádeni birlestiktiń jumys isteitinin, sondai-aq 41 dostyq úii ashylyp, 3 myńdai qoǵamdyq kelisim keńesteri qyzmet atqaryp jatqanyn atap ótti. 500 myńnan astam adam, 18 myńnan astam uiym 4,1 mlrd teńgeden astam qarajat kóleminde qaiyrymdylyq kómek aldy.
Memlekettik hatshy Qazaqstan 2018 jyly elordanyń 20 jyldyǵyn atap ótetinin aitty. Astana – Táýelsiz Qazaqstannyń simvoly, Prezident ideiasynyń iske asyrýynyń kórinisi jáne búkil halyqtyń eńbeginiń nátijesi. Gúlshara Ábdiqalyqova Qazaqstan halqy Assambleiasynyń tiisti is-sharalar josparyn ázirleýdi usyndy.
Jiyn barysynda «Qazaqstan halqy Assambleiasy týraly» zańǵa engiziletin ózgerister men tolyqtyrýlar jobasy, «Qazaqstan halqy» interaktivtik tarih kartasynyń, kóp fýnktsionaldy mýltimediialyq portaldyń ázirlený barysy, «Rýhani jańǵyrý» baǵdarlamasyn iske asyrýdaǵy Pavlodar oblystyq Assambleiasynyń tájiribesi talqylandy.
Keńes uiymdastyrý máselelerin qarastyryp, Qazaqstan Prezidenti – Qazaqstan halqy Assambleiasynyń Tóraǵasyna «Birlik» altyn medalimen, «Jomart jan» tósbelgisimen, QHA Tóraǵasynyń qurmet gramotasymen jáne alǵys hatymen marapattaý úshin kandidatýralar boiynsha usynystar engizdi.
.jpeg)