Jeti birdei qazynasyn pir tutyp, jeti atasyn sanamalaityn alty Alashtyń ul-qyzdary altaýdan ala bolmaǵan. Arailanǵan tań nurymen oianǵan azat eldiń qany bir urpaqtary qashanda tutastyqta bolýy kerek. Ulttyq tutastyq. Rýhani tutastyq. Máńgilik eldiń irgesi jasampazdyqta. Al, sol jasampazdyq tek birlik pen tutastyq arqyly ǵana qurylmaq. Rýlas emes, rýhtasyn izdeitin, jany birdi jaqyn tartyp, qany birdi qazyǵyna balaityn qazaqtardyń birlestigi – Dúnie júzi qazaqtarynyń qaýymdastyǵy.
Tatýlyqty tý etken babasynyń birligin búginde urpaǵy buzǵan emes. Kerisinshe, qandai da bir sebeptermen ata jurttan alystap, shekara shebinen asyp ketken qandastarymyzdy rýhani Otanyna qaitarý, olardy óz elinde ózekke teppei, janashyrlyq tanytý maqsatynda qurylǵan qaýymdastyq búgingi kúni tarydai shashyraǵan qarǵa tamyrly qazaqty qaitara aldy. Atalmysh qaýymdastyqtyń jumys barysymen tanystyrý, quramyna múshelikke alý maqsatynda aýdandyq mádeniet úiinde úlken jiyn ótti. Dúniejúzi qazaqtar qaýymdastyǵynyń Pavlodar oblystyq filialynyń basshysy Bolat Zaýytuly baianaýyldyq jurtshylyqpen kezdesip, birlestiktiń biregei jumystaryn tanystyryp ótti. Alqaly jiynǵa aýdan ákimi Orazgeldi Áliǵazyuly men aýdandyq máslihat hatshysy Temirbolat Múbarakuly qatysyp, qazaq kóshiniń keshegisi men búgingisin saralady.
Qazaqstan táýelsiz memleket retinde irgesin kótergen alǵashqy kúnderdiń ózinde qandastaryn qatarǵa qosýdy maqsat tutqan. Elbasy N.Á.Nazarbaev Túrkiianyń Stambýl qalasynda qazaq diasporasy ókilderimen kezdesip, eń alǵash qazaq jerinde quryltai ótkizý týraly sóz qozǵalǵan bolatyn. Kóp uzamai 1992 jyldyń qyrkúiek aiynda Almaty qalasynda tuńǵysh ret álem qazaqtarynyń quryltaiy ótip, Prezident mazmundy baiandama jasady. Sol quryltaida shetelderdegi qazaq diasporalarymen jumys isteitin qaýymdastyq quryldy. Tuńǵysh quryltai tarydai shashylyp júrgen sheteldegi qazaqtardyń birigip, ózderi turyp jatqan memleketterdiń zańy boiynsha qazaq mádeni ortalyqtaryn ashyp, ult retinde joiylyp ketpeýge úndegen uly jiynǵa ainaldy. Atap aitar bolsaq, qazaqtar shoǵyrlanyp ornalasqan memleketterdiń barlyǵynda derlik kishi quryltailar ótti. Mońǵoliia, Resei, Ózbekstan, Qyrǵyzstan jáne Tájikstanda Orta Aziia memleketteri men Aýǵanstan, Iran qazaqtarynyń kishi quryltaiy ótti. Al, Eýropadaǵy az ǵana qazaqtardyń birigip jylda kezektesip quryltai ótkizýi erlikpen para-par. Búgingi kúnde 2022 jylǵa deiin eýropalyq qazaqtardyń qai memlekette kishi quryltaiy ótetini kelisilgen. Ult bolyp uiysyp, halyq bolyp qalyptasýymyzdyń jolynda aýqymdy jumystar atqaryp júrgen qaýymdastyqtyń oblystyq filialy da mardymdy jumystar júrgizýde. B.Zaýytuly ár elde júrgen qazaqtardy rýhani qoldaý maqsatyndaǵy qaýymdastyqtyń 1998 jyly qurylǵanyn tilge tiek etip, búginge deiin jasalǵan jumystarymen tanystyryp ótti.
– Dúniejúzi qazaqtarynyń qaýymdastyǵy – qoǵamdyq uiym. Bul uiymnyń jumysy taǵdyr tálkegimen shekara syzyǵynyń ar jaǵynda qalǵan qazaq diasporasynyń qal-jaǵdaiyn, armany men úmitin memlekettik uiymdarǵa jetkizetin, máseleleri bolsa sheshýge atsalysatyn, baryp-kelýge jaǵdai týǵyzatyn altyn kópir ispetti. Qazaqstan zulmaty men ǵalamaty qatar órilgen jiyrmasynshy ǵasyrda aiaqqa turyp, sheteldegi qandastaryn Otanyna qaitara aldy. Búgingi kúnge deiin oblys boiynsha álemniń 12 elinen 7810 otbasy atajurtqa oraldy. Aldaǵy ýaqytta da júieli jumysqa bastaityn mardymdy josparlar qurylǵan. Taǵy bir qoldaý – «Otandastar» qory qurylmaq. Kásipkerler esebinen jinaqtalatyn qarajat qandastarymyzdyń jaǵdaiyn jasaýǵa jumsalatyn bolady, - deidi ol.
Qaýymdastyqtyń negizgi qyzmetimen tanystyrǵan Bolat Zaýytuly atalǵan birlestik qataryn molaitýǵa shaqyrdy. Óz eliniń patrioty sanalatyn ár qazaqty múshelikke qabyldaýǵa daiyn qaýymdastyqtyń erejelerin de nazarǵa usyndy. Jiyn sońynda aýdan ákimi Orazgeldi Qaiyrgeldinov sóz alyp, Qazaqstannyń, qazaq halqynyń búgingi tynysy men tirshiliginiń durys jolǵa qoiylǵanyn tilge tiek etip, bolashaqta qolǵa alynbaq qordyń óte oryndy bastama ekenin aitty.
Áliia TAÝKENOVA
