Ata-babalarymyzdan mura bolyp qalǵan dástúrli mýzykany dáripteý – búgingi urpaqqa amanat. Mádeniet ótken men búgindi bailanystyryp, bolashaqqa baǵdar bola alady. Sol sebepti de óskeleń urpaqtyń jeztańdai ánshi, dáýlesker kúishilerdiń «sarqytyn iship», olardyń ánderimen qulaq quryshyn qandyrýy mańyzdy.
Memleket basshysy Nursultan Nazarbaev «Uly dalanyń jeti qyry» maqalasynda bizdiń mádenietimizdiń shekiz ekenin tilge tiek etken bolatyn. Demek, qazaq halyq mýzykasyn nasihattaý arqyly dala folklorynyń mádenietin qaita jańǵyrtýymyzǵa tolyqtai múmkindik bar.
Osy oraida «Nur Otan» partiiasynyń qurylǵanyna 20 jyl tolýyna orai jáne «Uly dalanyń jeti qyry» maqalada aitylǵan ideialardy iske asyrý maqsatynda partiia bastamasymen «Uly dalanyń kóne áýenderi» dástúrli mýzyka festivali bastaý aldy.
Án men jyr merekesi kieli Semeiden bastalyp, Ertis-Baian óńirinde jalǵasyn tapty. Tól ónerimizdiń ieleri usynǵan keshti tamashalaý úshin J.Aimataýytov atyndaǵy qazaq mýzyka-drama teatryna jinalǵan jurtshylyqtyń qarasy qalyń boldy.
«Nur Otan» partiiasynyń Pavlodar oblystyq filialy tóraǵasynyń orynbasary Juldyz Táikebaeva partiianyń ulttyq qundylyqtardy ulyqtaýǵa árkez ázir ekenin tilge tiek etti.
Festivalge tanymal óner adamdary – jyr-termeshiler Almas Almatov, Jáken Omarov, dástúrli ánshiler Erlan Rysqali, Sholpan Dárjanova, Gúlmira Sarina, kúishiler Batyrjan Myqtybaev, Arman Júdebaev qatysty.
«Uly dalanyń kóne áýenderi» dástúrli mýzyka festivalinde belgili óner maitalmandarynan bólek, Pavlodar oblysynyń tanymal aǵa býyn ókilderi, Isa Baizaqov atyndaǵy oblystyq filarmoniia ónerpazdary men mýzyka mektebiniń oqýshylary, kolledj stýdentteri óner kórsetti. Olardyń qatarynda Medyǵat Manap, Serik Syzdyqov, Ásel Arynova, Názira Omar, Arhat Qairatuly, Janbolat Baisoltan, «Erkenaz» ansambli bar. Zalǵa jinalǵan kópshilik Estaidyń, Kenen Ázirbaevtyń, Mairanyń ánderin, Qurmanǵazynyń kúilerin, Mailyqojanyń jyr-termelerin tyńdady. Dombyra, sybyzǵy, syrnai, jetigen syndy ulttyq aspaptardyń súiemeldeýimen oryndalǵan shyǵarmalar erekshe áserli boldy.
Ónerpazdardyń shyǵarmashylyǵy qalyń kópshiliktiń kóńilinen shyqqany ystyq yqylasynan baiqalyp turdy. Pavlodarlyq kórermen qaýym osyndai rýhani keshterdiń jii uiymdastyrylǵanyn qalaidy.
