Rýdnyida kolledj ashanasynyń úsh qyzmetkerinen patogendi stafilokokk anyqtaldy, dep habarlady Sputnik Qazaqstan sanitariialyq-epidemiologiialyq baqylaý komitetine silteme jasap.
Qostanai oblysynda 20-21 sáýir aralyǵynda Rýdnyi taý-ken-tehnologiialyq kolledjiniń 14 stýdenti tamaqtan ýlanyp, juqpaly aýrýlar bólimine jatqyzyldy.
"Bul derek boiynsha departament pen aýmaqtyq sanitariialyq-epidemiologiialyq baqylaý basqarmasynyń mamandary qylmystyq is qozǵady. Kásipkerlik sýbektisi jalǵa alǵan kolledj ashanasyna jospardan tys tekserý júrgizildi", - delingen aqparatta.
Aýrýhanaǵa jatqyzylǵan stýdentterden patogendi altyn stafilokokk anyqtaldy. Epidemiologiialyq tekserý barysynda naýqastardyń júrek ainý, qusý sekildi belgileri kolledj ashanasynda tamaqqa bailanysty ekeni belgili boldy. Olardyń jaǵdaiy qalypty, aýrýhanadan shyǵarylyp, dárigerler baqylaýyna alyndy.
Al ashananyń úsh qyzmetkeri patogendi stafilokokk tasymaldaýshysy bolýy múmkin. Sondai-aq tekserý barysynda sanitarlyq erejelerdi buzý faktileri anyqtaldy. Tamaq ónimderi sapasy men qaýipsizdigin rastaityn qujatsyz paidalanylyp, saqtaý sharty men pisirý tehnologiiasy buzylǵan. Tekserý nátijeleri boiynsha qoldanystaǵy zańnamaǵa sáikes sharalar qabyldanady.
