Tanymal ánshi Roza Álqoja sońǵy kúnderi dini fanattardyń tarapynan soqqyǵa tap bolǵanyn jetkizdi, dep habarlaidy ult.kz Alash.KZ saityna silteme jasap.
Oǵan sebep — toi ústinde «áýen tyńdaý kúná» dep málimdeme jasaǵan azamattyń temir torǵa qamalýyna ánshiniń tikelei qatysy bar degen aiyptaýlar edi.
Aita ketý kerek, Túrkistan óńirindegi saltanatty jiyndardyń birinde oryn alǵan oqiǵa halyq arasynda qyzý pikirtalas týdyrdy. Nátijesinde, toida zańsyz nasihat júrgizgen er adam quqyq qorǵaý organdary tarapynan tutqyndaldy. Osy jaǵdaidan keiin ánshini kinálap, kúie jaqqysy keletinderdiń qatary kúrt ósken.
«Kesheden beri osy másele tóńireginde eregisip jatyrmyz. Biz de imannan maqurym emespiz, Jaratýshydan qorqatyn, Allaǵa shúkirshilik etetin jandarmyz. Meniń týǵan baýyrlarymnyń barlyǵy — bes ýaqyt qulshylyǵyn qaza qylmaityn azamattar. Biraq soǵan qaramastan, ásire dinshil qaýym bizge qarsy maidan ashyp aldy», — dep aǵynan jaryldy ánshi.
Roza Álqojanyń sózine súiensek, qazirgi ýaqytta oǵan «qoja áýletinen shyǵa tura, óz dindesińe qarsy shyqtyń» degen aiyp taǵatyndar kóbeigen.
«Tek qojalar ǵana emes, bizdiń barlyǵymyz — álimsaqtan beri islamdy ustanatyn musylmanbyz. Árine, bul dini joldy berik ustanyp, taqýalyq deńgeige jetkender de, biz siiaqty oǵan shamasy jetpei júrgender de bar. Kimniń shynaiy adasyp, kimniń týra jolda ekenin tek bir Alla ǵana kóredi. Adam balasy bolyp jaratylǵan soń, Jaratqan iemiz bárimizge shynaiy qulshylyq etýdi jazsyn. Al bul bolǵan jaǵdai — zań men qoǵamymyzdyń óz úkimi. Memlekettiń zańy bárine ortaq. Ol adam dindi qubyjyq etip kórsetip, óz sózinen ózi shatyldy. Munyń bári — Allanyń buiryǵymen bolǵan dúnie», — dep túiindedi óz oiyn ánshi.
