Reseidiń qorshaǵan ortaǵa baqylaý jasaý jáne gidrometeorologiia federaldyq qyzmeti (Rosgidromet) Resei aýmaǵyndaǵy radiatsiialyq ahýal týraly biýlleten jariialady.
Onda Cheliabinsk oblysyndaǵy "Maiak" óndiris birlestigi aimaǵynan júz kilometr jerde alynǵan synamadan radioaktivti rýtenii-106 (Ru-106) tirkelgeni aitylǵan.
Buǵan deiin Frantsiianyń iadrolyq jáne radiatsiialyq qaýipsizdik institýty (IRSN) Eýropa ústinen radioaktivti bultty anyqtaǵandaryn habarlaǵan. Institýt ǵalymdary rýtenii-106 radioaktivti bulty Qazaqstannan ne Reseiden, anyǵyraq aitqanda, Oral taýlarynyń ońtústigi men Cheliabinsk oblysynan taraýy múmkin ekenin aitqan.
Qazaqstandaǵy iadrolyq jáne radiatsiialyq qaýipsizdikke jáne ekologiiaǵa qatysy bar mekemelerdiń ókilderi radiatsiianyń Qazaqstannan taraǵanyn joqqa shyǵarǵan.
Resei biligi de Resei territoriiasynda qyrkúiekte radioaktivti nysandarda apat bolǵanyn nemese radioaktivti zat taralǵanyn joqqa shyǵarǵan bolatyn. Al "Rosatom" kompaniiasy radiatsiia óziniń kásipornynan shyǵyp jatyr degen tujyrymdy "negizsiz" dep ataǵan.
