Reseilik Rosatom memlekettik korporatsiiasy 8 tamyzda Arhangelsk oblysyndaǵy áskeri poligonnyń synaq alańynda bes qyzmetkerdiń qaza tapqanyn rastady. Suiyq reaktivti dvigatel qurylǵysyn synaqtan ótkizý kezinde jarylys bolǵan.
"Taǵy úsh áriptesimiz jaralanyp, túrli dárejede jaraqat aldy" delingen TASS agenttigi jariialaǵan kompaniianyń málimdemesinde.
Reseidiń qorǵanys ministrligi oqiǵa aimaqtaǵy radiatsiia deńgeiine áser etpedi, aýaǵa ziiandy zattardyń taralǵany baiqalmady dep málimdedi. Alaida poligonnan shamamen 30 shaqyrym jerde ornalasqan kórshi Severodvinski qalasynda jarylystan soń radiatsiia deńgeiiniń belgili bir ýaqyt aralyǵynda "qatty joǵarylaǵany" baiqalǵan. Tótenshe jaǵdai ministrligi deregine súiengen Greenpeace-tiń habarlaýynsha, radiatsiia deńgeii qalypty mólsherden 20 ese artyq bolǵan.
Juma, 9 tamyzda "Rospotrebnadzor" qyzmetiniń Arhangelsk oblystyq basqarmasy oqiǵadan soń Severodvinski poligonyndaǵy topyraq, sý, aýa quramy zerttelgenin habarlap, radiatsiianyń qalypty deńgeide ekenin aitqan.
Al Aq teńizdiń belgili bir bóliginde kemeler ýaqytsha toqtaǵan. Resmi organdar munyń oqiǵaǵa qatysy joǵyn aitady.
Batys derekkózderiniń habarlaýynsha, Aq teńiz jaǵalaýynda Arhangelsk oblysy Nionoks aýyly mańynda 8 tamyzda reaktivti dvigatel jarylǵan soń suiyq radioaktivti qaldyqtardy jinap, saqtaityn "Serebrianka" teplohody baiqalǵan.
Lenta.ru jazýynsha, bul poligonda mundai tótenshe oqiǵa alǵash ret bolyp otyrǵan joq. 2015 jyly jeltoqsan aiynda Nionoks túbinde synaq kezinde kenetten qanatty zymyrannyń bir bóligi ushyp ketip, úsh qabatty turǵyn úige túsken. Turǵyn úidiń shatyry men tórt páter búlingen. Zardap shekkender bolmaǵan.
