Tótenshe jaǵdailar ministrliginde «Qus tumaýynyń taralý jaǵdaiy týraly» kún tártibimen tótenshe jaǵdailardyń aldyn alý jáne joiý jónindegi Vedomstvoaralyq memlekettik komissiianyń otyrysy ótkizildi, dep habarlaidy "Ult aqparat" vedomstvonyń baspasóz qyzmetine silteme jasap.
Premer-Ministrdiń orynbasary Roman Skliardyń basshylyǵymen jáne ministr Iýrii Ilinniń tóraǵalyǵymen ótken beineselektorlyq rejimdegi otyrysqa memlekettik organdardyń basshylary, oblystar, Nur-Sultan, Almaty jáne Shymkent qalalary ákimderiniń orynbasarlary, tótenshe jaǵdailar departamentteriniń bastyqtary qatysty.
Jetekshilik etetin baǵyttar boiynsha jumys týraly Aýyl sharýashylyǵy, Densaýlyq saqtaý ministrlikteri basshylarynyń orynbasarlary sóz sóilep, halyq arasynda qus tumaýyn taratpaý jóninde qabyldanyp jatqan sharalar týraly baiandady.Sondai-aq birqatar oblys ákimderiniń orynbasarlarynyń baiandamasy tyńdaldy.
AShM Veterinarlyq baqylaý jáne qadaǵalaý komitetiniń derekteri boiynsha 9-29 qyrkúiek aralyǵynda 9 oblystyń 47 aýdanynyń jáne respýblikalyq mańyzy bar 1 qalanyń (Aqmola, Aqtóbe, Jambyl, Qaraǵandy, Qostanai, Pavlodar, SQO, Qyzylorda, Túrkistan, Shymkent qalalary) 102 eldi mekeninde 576 841 qustyń qyrylý faktisi tirkeldi, onyń ishinde 24 289-y jeke úide jáne 552 273-i qus fabrikasynda bolǵan.
Veterinariia jónindegi ulttyq referenttik ortalyqtyń derekteri boiynsha joǵary patogendi qus tumaýynyń kózi jáne tasymaldaýshysy soltústikten ońtústikke ushyp bara jatqan jabaiy qustar. Buǵan qyrylǵan jabaiy qustardy zertteý nátijeleri dálel.
Otyrys qorytyndysy boiynsha Premer-Ministrdiń orynbasary Roman Skliar múddeli memlekettik organdarǵa qus tumaýynyń taralý saldaryn barynsha azaitý boiynsha barlyq aldyn ala sharalardy qabyldaýdy tapsyrdy. Komissiia otyrysynyń sońynda hattamalyq sheshim qabyldandy.
