QR Premer-Ministriniń Orynbasary Roman Skliar men Qaraǵandy oblysynyń ákimi Jeńis Qasymbek Qaraǵandy oblysyndaǵy jol qurylysy jáne iri investitsiialyq jobalardyń iske asyrylý barysymen tanysty, dep habarlaidy QR Úkimetiniń baspasóz qyzmeti.
Roman Skliar Qaraǵandy-Temirtaý avtomobil jolynyń ýchaskesin qarap shyqty. Merdigerler jóndeý jumystaryn bir ai ishinde aiaqtaýǵa ýáde berdi. Jol alty jolaqty bolady. Kún saiyn osy jol arqyly 20 myńnan astam avtokólik ótedi. Vitse-premerge Qaraǵandydaǵy jańa joldar týraly baiandaldy. Aǵymdaǵy jyly jalpy uzaqtyǵy 48,3 km quraityn Soltústik jáne Shyǵys ainalma joldarynyń qurylysyn aiaqtaý josparlanýda.
Qaraǵandyda Roman Skliar 3-JEO-nyń M-10 jylý magistralin qaita jańartý barysymen tanysty. Jumys ótken jyly bastalyp, qazir aiaqtalýǵa jaqyn qaldy. Bul 60 myńǵa jýyq qaraǵandylyqtardy úzdiksiz jáne sapaly jylýmen qamtamasyz etýge múmkindik beredi.
Premer-Ministrdiń orynbasary Saran qalasyndaǵy «Kazcentrelectroprovod» JShS-de boldy. Kásiporyn kabel-ótkizgish, telekommýnikatsiialyq jáne elektrotehnikalyq ónimderdi, metall qurylymdaryn óndiredi, osy jyldyń bes aiynda óndiris kólemi 1,7 mlrd teńgeni qurady. Kabelderdi shyǵarý eki ese ósti. Qaraǵandylyq óndirýshi Qazaqstannyń qajettiligin qamtamasyz etýde. Onyń ónimderi aýyldardy tsifrlandyrý kezinde qoldanylady. Kásiporyn sondai-aq Resei men Ózbekstan úshin eksportqa jumys isteidi, ol qazirde Eýropa naryǵyna shyqty.
Sondai-aq, Roman Skliar Yutong markaly avtobýstar men arnaiy tehnika óndirisine qarajat salatyn investorlarmen kezdesti. Kásiporyn burynǵy RTI zaýytynyń bazasynda jumys isteitin bolady. Qazir qurylystyń birinshi kezeńi bastaldy. Óndiristi iske qosý jáne alǵashqy avtobýstardy shyǵarý biylǵy jyldyń jeltoqsan aiyna belgilengen. Zaýyttyń qýattylyǵy-jylyna 1 200 avtobýs jáne 500 arnaiy tehnika men arnaiy kólik shyǵarýdan turady. Jańadan 400 jumys orny qurylady.
Nysandy aralaý barysynda Roman Skliar men Jeńis Qasymbek avtobýstar óndirisi boiynsha investitsiialyq jobany iske asyrýdyń Jol kartasyna qol qoidy.
Sapar barysynda Qaraǵandy–Balqash avtojoly, uzaqtyǵy 363 km bolatyn «Ortalyq – Ońtústik» dálizin qaita jańartý barysy tekserildi. Jumys qyzý júrip jatyr. Sondai-aq, Roman Skliar men Jeńis Qasymbek «Kúrti-Býrylbaital» ýchaskesiniń qaita jańartylý barysyn qarap shyqty. Mundaǵy jóndeý jumystaryn 2022 jyly aiaqtaý josparlanyp otyr.
Jumys saparynyń qorytyndysy boiynsha Roman Skliar belgilengen josparlardy úzdiksiz jáne ýaqtyly oryndaý boiynsha tapsyrmalar berdi.
