QR Premer-Ministriniń orynbasary Roman Skliar Arys qalasyndaǵy turǵyn úiler men nysandardy qalpyna keltirý jumystarynyń barysyn tekserip, Túrkistan qalasynyń ákimshilik, tarihi-mádeni, áleýmettik mańyzdaǵy nysandarynyń qurylys alańdaryn aralady.
Bul týraly Túrkistan oblysy ákimdiginiń baspasóz qyzmeti habarlaidy.
Jumysshy top Túrkistan oblysynyń ákimi Ómirzaq Shókeevpen birge aldymen qaiyrymdylyq qordyń qarajatyna salynǵan turmysy tómen otbasylarǵa arnalǵan 50 úiden turatyn jańa shaǵyn aýdannyń qurylys barysymen tanysty.
Jańa úiler aiaqtalý satysynda tur, ishki árleý jumystary jáne úi jabdyqtaryn ornatý jumystary júrgizilýde. Jańa qurylys alańynda qajetti infraqurylymnyń qurylysy qatar júrgizilip, aldaǵy ýaqytta munda mektep, balabaqsha ǵimarattaryn turǵyzý kózdelgen. Kelesi kezekte Úkimet basshysynyń orynbasary Nur-Sultan qalasyna bekitilgen 9-sektordyń qurylys alańyn aralap shyǵyp, qaita salynǵan jeke úilerge kirip, olardyń ielerimen áńgimelesti.
Munda basym bóligi jer úiler men 50-den astam kópqabatty turǵyn úilerden turatyn 700-ge jýyq nysan boi kótergen. Qurylysshylarmen kezdesken Roman Skliar Nur-Sultan qalasyna bekitilgen qurylys qarqynyn jyldamdatýdy, bekitilgen kesteden keshikpei, qujattandyrý jumystaryn shuǵyl arada tolyqtai ótkizýdi tapsyrdy. Jumysshy top Arys qalasynda jinalys ótkizip, qurylys barysy men naqty atqarylǵan jumys nátijelerin talqylady. Arysta barlyǵy 68 áleýmettik nysan ornalasqan (bilim berý, densaýlyq saqtaý jáne sport mekemeleri), olardyń 64-i – kúrdeli jóndeýdi jáne 4-eýi – tolyqtai qalpyna keltirýdi talap etti.
Sondai-aq QR Úkimet basshysynyń orynbasary Túrkistan qalasyndaǵy qazany qainaǵan qurylys jumystarynyń barysymen tanysyp, ákimdik, media ortalyq, «Nur-Sultan» alańyn, Tuńǵysh Prezident saiabaǵy, halyqqa qyzmet kórsetý ortalyǵynyń ǵimaratyn, mýzyka mektebin, sonymen qatar attraktsiondary bar qalalyq saiabaqtyń qurylys jumystaryn aralap kórdi.
Jumys sapary barysynda QR Premer-Ministriniń orynbasary Roman Skliarǵa Túrkistan qalasyn salýdyń Bas jospary kórsetilip, jańadan boi kóteretin mádeni-rýhani ortalyqtyń jobasy tanystyryldy. Biregei jobaǵa AQSh -ń SOM – (Skidmore, Owings and Merrill) arhitektýralyq biýrosy jumyldyrylǵan. Álemdik deńgeidegi sáýlettik biýrosy dúniejúzindegi eń biik, qaitalanbas ǵimarattardyń jobalaryn jasaǵan.
