Indýstriia jáne infraqurylymdyq damý ministri Roman Skliar «Habar» arnasyna bergen suhbatynda aýyl sharýashylyǵy tehnikasyn quraý salasyn damytýǵa qarjylyq qoldaý qajettigin málim etti, dep habarlaidy QazAqparat tilshisi.
2018 jyly agroónerkásip salasynyń sýbektileriniń ótinishi boiynsha jyldyq 7 paiyzben tehnikany satyp alý baǵdarlamasy iske qosylǵan bolatyn. Biyl baǵdarlama tolyqqandy jumys júrgizip, «BRK Lizing» AQ arqyly jeńildetilgen tártippen otandyq óndiristegi aýyl sharýashylyǵy tehnikasyn satyp alýǵa jol ashyp otyr.
«Kóptegen aýyl sharýashylyǵy ónimderin óndirýshiler memleket tarapynan kórsetiletin yntalantyrý tetikterin bilmeidi. Túsindire keteiin: ýtilizatsiialyq jinaý sharýasyn óndirýshi nemese importer júrgizedi. Sharýa qojalyqtardyń ózderi qurap alýǵa mindettelmeidi! Avtokólik salasynyń tájiribesi boiynsha «Operator ROP» JShS eski tehnikalardy ýtilizatsiiany erikti túrde júrgizedi. Sol eski tehnikanyń iesi ýtilizatsiialyq sertifikatqa ie bolady. Ol sertifikatty jańa tehnikany satyp alýda alǵashqy jarna retinde paidalanýǵa bolady», - dedi Roman Skliar.
Ministr bul rette, otandyq aýyl sharýashylyǵy tehnikalarynyń baǵasy sharyqtap ketpeitinin atap ótti. Qazaqstandyq sharýalar burynǵy sharttar boiynsha traktorlar men kombaindardy satyp ala alady. Roman Skliar sonymen qatar qazaqstandyq naryqqa sheteldik tehnikalardy importtaý arqyly paida taýyp otyrǵan belgili bir toptyń taratqan qaýesetine senbeýge shaqyrdy.
«Qazaqstannyń aýmaǵynda aýyl sharýashylyǵy tehnikasyn quraý salasy arqyly 5,5 myń jańa jumys ornyn ashýǵa tolyq múmkindik bar», - dedi Roman Skliar.
