Búginde robottardyń adam ómirine áseri aiqyn sezile bastady. Onyń turmysqa tigizer áseri, qajettiligi ýaqyt ótken saiyn arta tústi. Tehnologiia dami túsken saiyn robottardyń sany artyp, túrli salalarda oń ózgerister bolyp jatyr. Búgin biz sońǵy jetistikterge súiene otyryp, robottardyń adam ómirindegi ornyn naqty mysaldarmen saraptap ótýdi jón kórdik.
Robot degenimiz ne?
Eń aldymen «robot degenimiz ne» degen suraqtyń jaýabyn taýyp alaiyq. Bul uǵymnyń naqty bir resmi anyqtamasy joq. Desek te, robotehnika mamandary «ózi qozǵalatyn nemese qozǵalmaly bólikteri bar jáne óz qimyly arqyly sheshim qabyldaityn mashinany» robot dep sanaidy.
Sol sebepti, úiden shyǵar kezde qosyp ketetin shańsorǵyshyńyzdy «robot» dep ataýǵa bolady. Shańsorǵyshyńyz ainalasyn sezý arqyly úidi jiystyrǵanda ne isteý kerektigin ózi sheshe alady.
Al kir jýǵysh mashinany robottar qataryna jatqyzy almaimyz. Sebebi, onyń jumys retin siz tańdai alasyz, ol tek buiryǵyńyzdy buljytpai oryndaidy. Árine, bul taqyryptyń daýly tustary jeterlik. Qazirgi kezde bul anyqtama tóńireginde qyzý pikirtalastar júrip jatyr.
Azyq-túlikti irikteitin robottar
Ótken aptada kúrishten tamaq daiyndadyńyz delik. Onyń ár dánin ótkir, kózdi júiesi bar robottandyrylǵan mashina iriktegen. Kúrish suryptaityn mashinalar – avtomattandyrý salasynyń tańǵalarlyq jetistigi. Alaida jurttyń kóbisi ol týraly habarsyz. Jalpy, kúrish dúkendegidei túsi men pishini birkelki dánder túrinde ónim beredi dep oilaisańyz, múlde qatelesesiz.
Kúrishti túsine qarap irikteý
Kúrishtiń ár dáni óte júirik kameralarmen, jaryq pen kompiýter paidalanylatyn robotty mashina arqyly ótedi. Kompiýter ár dánniń sýretin saraptap, ony qai surypqa jatqyzý kerektigine qatysty sheshim qabyldaidy. Qajetti ydysqa baǵyttaý úshin aýa aǵynyn qosyp ne ajyratyp turady. Bul qimyldy sekýndyna júzdegen ret qaitalaidy.
Osylaisha, robottar túrli daqyldy iriktep otyrady. Búginde bul naryq qarqyndy túrde ósip keledi. Qazirgi tańda bidai, burshaq jáne ósimdik tuqymdaryn suryptaityn robottar jumys isteidi.
Medikterdi úiretetin robottar
Robottardyń qajettiligi meditsina salasynada da aiqyn kórine bastady. Kóptegen dárigerler men medbikeler robot túrindegi naýqastar arqyly arnaiy jattyǵýlar jasaidy eken.
Bul robottar medikterge aýrýdy emdeýdiń joldaryn bilýge múmkindik ashady. Iaǵni, adamdarǵa synaq jasamai-aq, syrqat túrin shataspai anyqtap, em ádisterin durys qoldanýǵa úiretedi. Muny ushqyshtardy kókte samǵaýǵa jattyqtyratyn simýliatorlarmen salystyrýǵa bolady.
Keibir meditsinalyq robottardyń boiy da, júzi de kádimgi adaǵa uqsaidy. Al arnaiy mamandandyrylǵan ózge túrleri adam aǵzasynyń bir bóligi túrinde bolýy múmkin.
Politsiiany jattyqtyratyn robottar
Tonaý kezinde qarýly qaraqshylardyń qolyna túsip kórdińiz be? Árine, mundai oqiǵaǵa dýshar bolmadyńyz degen úmittemiz. Desek te, eger osyndai jaǵdaiǵa tússeńiz, kepilderdi bosatýǵa qatysqan politsiia shuǵyl qimyl tobyndaǵy mergenderdi robottardyń kómegimen daiyndaǵan bolýy yqtimal.
Sidneidegi «Marathon Targets» kompaniiasy joǵary ónimdi, jyljymaly robottardy satýmen ainalysady. Ásker men politsiia jattyǵý kezinde olarǵa oq ata alady. Sol sebepti, quryshpen qaptalǵan bul robottar naǵyz qarý qoldanylatyn jattyǵý kezinde naqty nysan retinde paidalanylady.
Ý shyǵaratyn robottar
Ómirińizde dári iship kórgenińiz anyq. Bul dári bezgekke qarsy nemese immýnalyq júieni basýǵa arnalǵan bolsa, onyń quramynda sary shaiannyń ýy bolýy múmkin. Osy jándikterdiń ýyn alý adam úshin qaýipti ekeni sózsiz, biraq robottarǵa esh ziiany joq.
Káriz júiesin tazartatyn robottar
Ádette biz káriz júiesi týraly kóp oilanba bermeimiz. Eger ol isten shyqsa ǵana, birden nazar aýdaramyz. Bul álemniń kóptegen qalalarynda úlken máselege ainalǵan. Búgingi tańda káriz júiesin tekserý men tazartýdyń mańyzy arta tústi. Alaida, endi osy aýyr istiń de sheshý joldary tabyldy. Káriz júiesin tazartatyn robottar bul máselede kómekshi bola alady.
Robottar men saýda
Dúken aralap, onlain túrde taýarǵa tapsyrys bergen kezińiz boldy ma? Al, satyp alǵan zattardyń kóbisin saýda ornyna jetkizý úshin robottar qolanylatynyn bilesiz be?
Búginde konteinerler tasymalymen ainalysatyn keibir teńiz ailaqtary jartylai avtomattandyrylǵan. Kran basqaratyn adamdar úlken konteinerlerdi kemelerden jerge túsiredi.
Osydan keiin robottalǵan úlken krandar jumysqa kirisip ketedi. Olar ailaq aýmaǵynda qozǵalyp, konteinerlerdi jinap, bir retke keltiredi. Daiyn bolysymen avtomatty túrde júk kólikterine tieledi.
Qoimalarda qoldanylatyn robottar
Qoimalardyń kóbisi de jyljymaly robottardy paidalanyp júr. Bul isti avtomattandyrýdyń úlgisi retinde «Amazon» kompaniiasyn mysalǵa keltirýge bolady. Áigili kompaniia óz qoimalaryn jyljymaly robottardyń sórelerdi tasý yńǵaiyna bailanysty arnaiy salǵan.
«Amazon» 2012 jyly qoimalaryndaǵy robottardyń óz tabysyna qosqan úlesin sezip, olardy shyǵarǵan kompaniiany 775 million dollarǵa satyp alǵan.
Robot jasaý salasynda bolyp jatqan revoliýtsiia
Biz búgin ótken aptada robottardyń turmysyńyzǵa áser etken alty mysalyn ǵana sóz ettik. Árine, taǵy da onshaqtysy atalmai qaldy. Biz bul tizimge kózge aiqyn kóringen ózgeristerdi ǵana qostyq.
Aqparat quraldary robot jasaý salasyndaǵy bolashaq revoliýtsiia týraly jii jazady. Biraq bul búginniń ózinde bolyp jatqan úrdis. Alaida adamdardyń kóbisi ony áli tolyq ańǵarmai júr.
