Tanymal aitysker aqyn, búginde «Alataý» dástúrli óner teatrynyń direktory qyzmetin atqaryp júrgen Rinat Zaitov Prezident Qasym-Jomart Toqaevtyń Qazaqstan halqyna Joldaýyna pikir bildirdi, - dep habarlady turkystan.kz.
«Memleket basshysy Qasym-Jomart Kemeluly Toqaev qos Palatanyń birlesken otyrysyna qatysyp, Qazaqstan halqyna Joldaýyn arnady. Bul Joldaýdy biz asyǵa kúttik, úlken qobaljýmen tyńdadyq. Sebebi, osy joly Prezident burynǵy dástúrdi ózgertip, eldiń negizgi baǵyt-baǵdaryn aiqyndaý, Jańa Qazaqstandy qurý boiynsha naqty qadamdardy atady», – dep bastady sózin ol.
Odan ári aitysker Prezidenttiń qańtar qasireti men jańa oblystardy ashýǵa qatysty oilarymen tolyq kelisetinin atap ótti.
«Qańtar oqiǵasy», odan keiin bolǵan elimizdegi birqatar kútpegen jaǵdailar, osylardyń barlyǵy bir túiindi qajet etti. Sol túiin búgin aityldy dep oilaimyn óz basym. Qazaqstan azamattarynyń da kóńilinen shyqty dei alamyn. Atap aitatyn bolsam, eńsesi túsip, ábden tozyńqyrap qalǵan óńirlerdiń qaita jandanýyna múmkindik berip, Abai, Ulytaý, Jetisý oblystary ashyldy. Bul sońy emes bolar. Óitkeni, bizde áli de ondai aimaqtar bar», – dedi ol.
Sonymen qatar, ol Toqaevtyń Konstitýtsiialyq sot, Ulttyq quryltai, Esep komitetiniń ornyna joǵary aýditorlyq Palata qurý, Máslihat tóraǵasy laýazymyn engizý, sailaý zańnamalarynyń saqtalýyn qadaǵalaý úshin baiqaýshylardyń quqyqtary men jaýapkershiligin naqty belgileý, majoritarlyq sailaý júiesin qoldaný, Prezidenttiń ókilettik kezeńinde partiiaǵa músheligin toqtatý mindetin zańnamalyq túrde resimdeý, ákimder men olardyń orynbasarlaryna partiia filialdarynda qyzmet atqarýǵa zań júzinde tyiym salý, buqaralyq aqparat quraldarynyń básekege qabiletti jáne erkin bolýyna qatysty usynystaryna qoldaý bildirdi.
«Osy usynystardyń bári biz úshin úlken qýanysh. Barlyǵy tegis quptarlyq. Taǵy bir kóńil qýantatyny, Almaty oblysynyń ortalyǵy Qapshaǵaiǵa Qonaevtyń esimin berý týraly aityldy. Eger tańdaý halyq jaqta bolsa, qazirdiń ózinde 80 paiyzy qoldaidy. Óziniń basshylyq mysymen, Prezidenttik ókilettiligimen osy jyldyń ortasyna deiin joǵaryda atalǵandardyń oryndalýyn talap etýi biz úshin sert bergenmen birdei boldy. Qudai buiyrtsa, Joldaý eshqandai kedergisiz elimizge ońtaily ózgerister ákeledi. Sony kórýge jazsyn. Jasasyn, Jańa Qazaqstan! Prezident Joldaýyna alǵys bildiremiz», – dedi aqyn.
