Jaqynda jýnalist Bibigúl Dáýletbekqyzy «Habar» Agenttigi» AQ Basqarma bastyǵynyń orynbasary Rinat Kertaevty aiyptap, jazba jariialaǵan bolatyn. Avtor Rinat Dýmanulynyń óz ideiasyn urlap alǵanyn tilge tiek etken-di. Jazba jelide qyzý talqyǵa túsip, túrli pikirler aitylýda. Búgin Rinat Kertaev óz paraqshasynda Bibigúl Dáýletbekqyzynyń synyna jaýap berdi. Tolyq mátin tómendegidei.
***
Áriptesim Bibigúl Dáýletbekqyzy áleýmettik jelide maǵan qatysty bazynasyn aitypty. Bul bazynanyń meniń naqty qolyma alǵan jumysyma tikelei qatysy bolǵandyqtan, Sizderdiń nazarlaryńyzǵa óz jaýabymdy usynǵym keledi.
Birinshiden, «Habar» Agenttiginiń Kórkemdik keńesine Bibigúl Dáýletbekqyzynan «Ai-hai, 25» degen atpen eshqandai baǵdarlamanyń jobasy resmi usynylǵan joq. Biraq, menimen kezdesýinde birneshe jobasymen qatar «Ai-hai, 25» týrasynda da aýyzsha baiandaǵany ras. Byltyr, iaǵni Táýelsizdiktiń 25 jyldyǵyna orai shirek ǵasyr ishinde elimizdiń jetken jetistikteri kórsetiletin basqa da jobalar Kórkemdik keńeske usynylǵan bolatyn. Sonyń biri – «Fresh TV» kompaniiasynyń ideiasy. Baǵdarlamanyń avtorlary jáne stsenaristeri – Ásel Qairolla jáne Almas Toqabaev. Atalǵan avtorlar jáne óndirýshi kompaniia baǵdarlamanyń ataýyna qatysty mynadai usynystar bergen: «Ósken órken», «Pai-pai, 25», «Shirek ǵasyr». Kórkemdik keńestiń sheshimi boiynsha atalǵan joba efirge shyǵarýǵa laiyq dep tanylyp, onyń «Pai-pai, 25» degen ataýyna toqtaǵan bolatyn.
Ekinshiden, «Pai – pai, 25» jobasy avtorlyq quqyq talaptaryna tolyqtai sai júzege asyrylǵan baǵdarlama. «Fresh TV» kompaniiasy baǵdarlama jasaý jáne prokat talaptaryna sai «Habar» Agenttigine baǵdarlamanyń avtorlyq quqyqtaryn tapsyrdy. Avtorlyq quqyq salasyndaǵy zańnama talaptary tolyqtai saqtalǵan jáne «Habar» Agenttigine tiesili.
Árine, «Pai – pai, 25» degen sózdiń «Aihai 25» degen sózge uqsastyǵy bar bolǵanmen, qurylymy múldem basqa. Bizdiń arnadan ótken baǵdarlamada el ómirindegi eleýli oqiǵalardyń jai-japsary jan-jaqty baiandaldy. Stýdiiaǵa kelgen tanymal tulǵalar (saiasatkerler, sportshylar men ziialy qaýym ókilderi) óz estelikterimen bólisip, elimizdiń ótkeni men keleshegin talqylaidy. Osylaisha, Bibigúl Dáýletbekqyzy usynǵan «Aihai 25» jobasymen eshqandai uqsastyǵy joq jáne buny menimen kezdesýinde ózi de moiyndaǵan bolatyn. Qajet bolǵan jaǵdaida, Agenttik zań júzinde óz quqyǵyn qorǵap shyǵýǵa daiyn.
Bibigúl Dáýletbekqyzynyń osy jazbalarynan tek bir uiǵarymyna tolyq kelisemin. Eshqandai qyzmet te, mansap ta máńgilik emes. Men úshin halyqtyń múddesi alǵy orynda. Sondyqtan, bul múdde jolynda kimmen bolsyn, kezdesýge daiynmyn, qandai ideia bolsyn qarastyrýǵa ázirmiz. Bizdiń Agenttikke qarasty efirden ótetin jobalardyń bári Kórkemdik keńeste qaralatynyn eskertkim keledi. Jobany qaraý ia ony efirge jiberý boiynsha sheshimdi men jalǵyz qabyldamaimyn. Taǵy da qaitalap aitamyn, memleketshildik sanany bekitetin, azamattyq qoǵamnyń deńgeiin arttyratyn, ár azamattyń týǵan jerine degen súiispenshiligin kóteretin kez-kelgen jobany qarastyrýǵa ázirmiz.
P.S. «Pai-pai, 25» baǵdarlamasynan beihabar, onyń ereksheligin bilmeitin, tanys emes adamdar kóremin dese, tómendegi silteme arqyly ótýge bolady: http://khabar.kz/kz/m-ra-at-paj-paj-25
