Rim papasy Frantsisk tarihta tuńǵysh ret Birikken Arab Ámirlikterine saparmen bardy. Jeksenbide bastalǵan Rim papasynyń úsh kúndik saparynyń maqsaty – dinaralyq dialog jónindegi konferentsiiaǵa qatysý.
Aqsaqaldar musylman keńesi aiasynda uiymdastyrylǵan konferentsiiada dini fanatizmge qarsy kúres talqylanady. Jiyn ótkizý týraly bastamany Egipettegi ál-Azhar ýniversitetiniń imamy Ahmed ál-Taieb kótergen. Buǵan deiin Papa Frantsisk onymen birneshe ret kezdesken.
Sapar kezinde Rim katolik shirkeýiniń basshysy Birikken Arab Ámirlikterindegi musylman jáne býddizm qaýymdastyqtary ókilderimen, taq murageri hanzada Muhammed ibn Zaid ál Nahaiianmen kezdesedi. Sonymen birge pontifik Birikken Arab Ámirlikterinde turatyn, jalpy sany 900 myńǵa jýyq adamdy quraityn (shamamen el turǵyndarynyń onnan bir bóligi) katolikter qaýymdastyǵynyń jai-kúiimen tanyspaq.
5 aqpanda Frantsisk Ábý-Dabide Qudaiǵa qulshylyq rásimin ótkizedi, oǵan 130 myń bilet túgeldei satylyp ketken dep habarlaidy RFI.
