Memleket basshysy Qasym-Jomart Toqaev beinebailanys rejiminde Rim Papasy Frantsiskpen kelissóz júrgizdi, - dep habarlaidy "Ult aqparat" Aqorda saityna silteme jasap.
Kezdesý barysynda Qazaqstan men Vatikan arasyndaǵy yntymaqtastyqty nyǵaitýdyń perspektivalary, sondai-aq konfessiiaaralyq kelisim men dinaralyq dialogty ilgeriletý máseleleri talqylandy.
Biyl qyrkúiek aiynda elordada ótetin Álemdik jáne dástúrli dinder kóshbasshylarynyń VII seziniń kún tártibine basa mán berildi. Qasym-Jomart Toqaev bul forýmnyń Qazaqstan úshin mańyzy zor ekenin atap ótti.
Prezident konfessiiaaralyq kelisim men birliktiń qazaqstandyq modeli týraly aitty. Sondai-aq Memleket basshysy Rim Papasyna Qazaqstanda júzege asyrylyp jatqan aýqymdy saiasi jáne ekonomikalyq reformalar jóninde málimet berdi.
Rim Papasy kezdesýge múmkindik bergeni úshin Prezidentke rizashylyǵyn bildirip, Qazaqstanǵa resmi saparmen keletinin, Álemdik jáne dástúrli dinder kóshbasshylarynyń VII sezine qatysatynyn rastady. Sondai-aq óziniń Qazaqstanǵa sapary men aldaǵy ýaqytta ótetin forýmnan úlken úmit kútetinin jetkizdi.
"Men dinaralyq dialogty, memleketterdiń birligi men jaqyndasýyn ilgeriletý turǵysynan osy keleli jiyndy taǵatsyzdana kútemin. Munyń qazirgi ýaqytta máni óte zor", - dedi Katolik shirkeýiniń basshysy.
Pontifik qazirgi kúrdeli geosaiasi jaǵdai kezinde álemde birlik pen kelisimge qol jetkizýdiń asa mańyzdy ekenin atap ótti.
"Sizdiń elińizdiń qanshalyqty áralýan jáne tutas ekenin kórip otyrmyz. Bul - turaqtylyqtyń negizi. Qazaqstanda buǵan túsinistikpen qaraitynyna qýanyshtymyz. Meniń qoldaýyma senýińizge bolady. Sizdiń kúsh-jigerińizdi baǵalaimyn", - dedi Rim Papasy.
Áńgimelesý sońynda Qasym-Jomart Toqaev Qazaqstannyń Qasietti Taqpen rýhani kelisim jáne ózara qurmet kórsetý salasyndaǵy yntymaqtastyqty odan ári damytýǵa beiildi ekenin naqtylady.
