© Sputnik / Abzal Kaliev
Elordaǵa Álemdik jáne dástúrli dinder sezine kelgen Rim papasy Frantsisk qazaqstandyqtarǵa úndeý joldady, dep habarlaidy Sputnik Qazaqstan tilshisi.
"Men úshin ulan-baitaq, tarihy tereń kóne jerge kelý úlken qurmet. Men bul jerge dialog pen birlik izdep, beibitshilik qajysy retinde keldim. Qazir bizdiń álem garmoniiaǵa asa muqtaj. Al Qazaqstanǵa qatysty aitar bolsam, jaqynda men qazaqtyń mýzykalyq aspaby – dombyra jaily bildim. Dál osy dombyra Qazaqstannyń basty simvoldarynyń biri", - dep bastady sózin Rim papasy Frantsisk astanadaǵy "Qazaqstan" ortalyq kontsert zalynda azamattyq qoǵammen kezdesýinde.
Ol kezinde qazaq jerinde kontslagerler bolǵanyn, adamdar qýǵyn-súrginge ushyraǵanyn eske saldy. "Dese de qazaq halqy eshbir qiynshylyqqa moiyǵan joq. Óz mádenieti men dástúrin saqtap qaldy", dep jalǵastyrdy sózin pontifik.
Rim papasy Qazaqstan kópultty memleket, árkimniń óz tili men dástúri baryn, bári bir shańyraq astynda birlik pen aýyzbirshilikte ómir súrip jatqanyn atap ótti. Sondai-aq Katolik shirkeýiniń basshysy Qazaqstanǵa ólim jazasyn alyp tastaǵany úshin alǵys aitty.
"Sizge ólim jazasyn alyp tastaǵanyńyz úshin úlken rizashylyǵymdy bildirgim keledi. Osylaisha sizder kóptegen adamǵa úmit berdińizder", - dedi ol.
Buǵan qosa pontifik sońǵy ailarda Qazaqstanda demokratiialandyrý protsesi óte qarqyndy júrip jatqanyna toqtaldy.
"Parlament pen jergilikti bilikke kóbirek ókilettik berý kózdelip otyr. Men munyń uzaq jol ekenin túsinemin. Dese de bul halyqtyń ál aýqatyn jaqsartyp, eldi gúldendirýge aparatyn jol. Bul protsester sóz júzinde ǵana emes, shynymen iske asyrylyp jatyr", - dedi Rim papasy Frantsisk.
Dese de, onyń aitýynsha, demokratiia men bostandyq deklaratsiiamen ǵana shektelmeýge tiis, halyqqa qyzmet etýge tiis. Bilik halyq únine qulaq asyp, zańdy talabyna jaýap berýge tyrysýy qajet. Eske salsaq, búgin Rim papasy Frantsisk Álemdik jáne dástúrli dinder liderleriniń VII sezine qatysý úshin elordaǵa keldi. Áýejaida Katolik shirkeýiniń basshysyn prezident Qasym-Jomart Toqaev qarsy aldy.
Aita keteri, Álemdik jáne dástúrli dinder liderleriniń VII sezi 14-15 qyrkúiekte astanadaǵy Táýelsizdik saraiynda ótedi.
