Sýret: Tengrinews.kz
Shyǵys Qazaqstan oblysy Ridder qalasyndaǵy jylý elektr ortalyǵynyń iesi aýysty. Bul týraly Úkimet otyrysynan keiin tilshiler suraǵyna jaýap bergen ShQO ákimi Danial Ahmetov aitty, dep habarlaidy QazAqparat.
- Jylý elektr ortalyǵynyń iesi aýysty. Búgin satyp alý-satý sharty jasalyp, qol qoiyldy. JEO-nyń jańa iesimen birge jumys isteýdi bastap kettik. Kelisimge sáikes, ol kompaniia qysqa ýaqyt ishinde ortalyqqa kem degende 7 mlrd teńge investitsiia jasai alatynyn banktik esepshoty arqyly kórsetip, dáleldeýi kerek, - dedi ol.
Aimaq basshysynyń aitýynsha, bul qarajat JEO-ny kúrdeli jóndeýge jumsalady.
Eske salsaq, 26 qańtarda Ridderdegi jylý elektr ortalyǵynan órt shyqqan bolatyn. Birneshe saǵattyń ishinde qyzyl jalyn aýyzdyqtaldy. Keiinnen jylý elektr ortalyǵynyń basshylyǵyna qatysty tergeý júrgizilip jatqany habarlandy.
Sondai-aq Danial Ahmetov Ridder jylý elektr ortalyǵyndaǵy aqaýlar men apattardan úileri qaita-qaita sýyp ketip otyrǵan turǵyndardan keshirim suraǵan edi.
