Shyǵys Qazaqstan oblysy Ridder qalasyndaǵy jylý elektr ortalyǵyn qalpyna keltirý jumystary jalǵasýda, dep habarlaidy QazAqparat.

ShQO ákimi Danial Ahmetov jumys saparymen Ridder qalasyna baryp, jylý elektr ortalyǵyndaǵy jóndeý jáne qalpyna keltirý jumystarynyń barysymen tanysty.

«Barlyǵy bekitilgen kestege sáikes júrgizilýde. Qazir úsh qazandyq jumys istep tur, bireýi - joǵary qysymdy. Tórtinshi qazandyq agregatyn jóndeý aiaqtaldy, iske qosý jáne retteý jumystary júrip jatyr. Besinshi qazandyqtyń jabdyqtary jóndelýde», - deidi aimaq basshysy.

Belgili bolǵandai, Ridder jylý elektr ortalyǵynyń barlyq jabdyqtary óte tozǵan. Onyń ieleri nysandy qaýipti jaǵdaiǵa deiin jetkizgen. Jylytý maýsymyna birde-bir qazandyq qondyrǵysy daiyn bolmai shyqty.

«Qazirgi tańda bizdiń mamandar elektr jabdyǵyn jóndeýden bastap dánekerleý jumystaryna deiin barlyǵyn isteýde. Olarǵa Reseidiń Qazan qalasynan kelgen energetikter belsendi túrde kómek kórsetýde. Osylaisha, jańartylǵan úsh joǵary qysymdy qazandyq qatań aýa raiy jaǵdaiynda temperatýra rejimin saqtaýǵa múmkindik beredi. Ortalyqty satyp alý nemese kommýnaldyq menshikke berý týraly ielerine eki ret júgindim. Bul bastama QR Úkimeti deńgeiinde maquldandy», - deidi Danial Ahmetov.