Shyǵys Qazaqstan oblysy Ridder orman sharýashylyǵynda shyqqan tilsiz jaýmen 2 kún boiy kúresken órt sóndirýshilerdiń videosy jurttyń júregin eljiretti, dep habarlaidy "Ult aqparat".
Áleýmettik jelilerde qyzyl jalynmen 2 kún boiy damylsyz arpalysqan órt sóndirýshilerdiń ábden qaljyryp, uiqyǵa bas qoiǵan videosy jariialandy.
Jeli qoldanýshylary mańdai ter men birlesken kúsh-jigerdiń arqasynda órtti jeńgen qutqarýshylarǵa rizashylyqtaryn bildirýde.
Atalmysh videoda rasymende Ridder orman sharýashylyǵyndaǵy alapat jalynmen kúresken órt sóndirýshiler ekendigin Shyǵys Qazaqstan oblystyq Tótenshe jaǵdailar departamenti rastap otyr.
«Videoda tilsiz jaýdy aýyzdyqtap bolǵannan keiin tynyǵyp jatqan №14 órt sóndirý bólimshesi bastyǵynyń orynbasary, azamattyq qorǵanys aǵa leitenanty Ulan Nurmuhambet, jasaq komandirleri Rinat Saǵidýldinov, Hafiz Saǵiev, Nurlan Jadalinov jáne órt sóndirýshiler Didar Sarsekov, Almas Tursynǵaliev, Kaǵybat Silámbek», - dep habarlady vedomstvo ókilderi.
300 gektarǵa jýyq aýmaqty sharpyǵan órtti óshirýge Ridder qalasynyń mamandandyrylǵan órt sóndirý bólimi, №14 órt sóndirý bólimi, Óskemen qalasynyń №4, 6, 7,8,9 órt sóndirý bólimderi men mamandandyrylǵan jáne jedel qutqarý jasaqtary, Cheremshanka aýylyndaǵy №43 órt sóndirý beketi, Shemonaiha qalasyndaǵy №28 órt sóndirý bólimi, Beloýsovka kentindegi №24 órt sóndirý bólimi, «Qazaviaormanqorǵaý», Kásibi áskerilendirilgen apattyq qutqarý qyzmeti, Ridder jáne Glýbokoe orman sharýashylyqtary, Áskerilendirilgen qutqarýshy bólim, Ridder qalalyq «Vodokanal» mekemesi jáne «Qaztsink» taý-ken baiytý kesheniniń qyzmetkerleri jumyldyrylǵan.
Esterińizge sala ketsek, 10 mamyrda Shyǵys Qazaqstandaǵy Ridder orman sharýashylyǵynda alapat órt shyqqan. Órtten 1 adam qaza taýyp, ekeýi jaraqat alǵan. Memleket basshysy Úkimet pen Shyǵys Qazaqstan oblysynyń ákimdigi tilsiz jaýdan zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy. Búgin saǵat 18.20 órt aýyzdyqtaldy.
