Shyǵys Qazaqstan oblysy Ridder qalasynda órtten zardap shekken otbasylar jańa úilerge kóshti, dep habarlaidy QazAqparat.
ShQO aqparat ortalyǵynyń málimetine súiensen, jańa «Botanika» shaǵyn aýdanynda 32 úi salyndy.
Osydan eki jarym ai buryn úii otqa oranǵan azamattar búginde jańa baspanasynyń kiltin alyp otyr.
«Óńirdiń qurylys kompaniialary úilerdi qysqa merzim ishinde salyp bitti. Olardyń árqaisysynda zamanaýi jylytý peshteri men as úi garnitýralary ornatylǵan. Bizge kómek kórsetken barlyq adamǵa úlken rahmet aitqym keledi», - deidi orman órtinen zardap shekkenderdiń biri Anna Iseneva.
Qurylys kompaniialary balalar men sport alańdaryn, onyń ishinde fýtbol alańyn da salǵan. Ortalyq jaryqtandyrý, úilerge asfalttalǵan jol júrgizildi.
Avtobýs aialdamalary da ornatyldy. Jańa shaǵyn aýdanǵa eki kópbalaly otbasy qonystanǵan.
Shaǵyn aýdannyń qurylysy aldaǵy ýaqytta da jalǵasady. Jospar boiynsha biyl taǵy 110 úi salý úshin ýchaskeler bólinbek.
Esterińizge sala ketsek, biylǵy 10 mamyrda ShQO-daǵy Ridder orman sharýashylyǵynda órt shyqty. Dala órti 310 gektar aýmaqty sharpyp, 1 adam qaza tapty.
Memleket basshysy Qasym-Jomart Toqaev Úkimet pen Shyǵys Qazaqstan oblysynyń ákimdigi órtten zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrǵan bolatyn.
