Shyǵys Qazaqstan oblysy Ridder qalasynda órt shyqqan kópqabatty úiden 11 adam evakýatsiialandy, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, Ridder qalasynda kópqabatty úidiń úshinshi qabatyndaǵy páterde órt shyqqan.
«Oqiǵa ornyna shuǵyl jetken qutqarýshylar barlaý kezinde tútin tumshalaǵan bólmelerdiń birinen es-tússiz jatqan er adamdy tapty. №1 mamandandyrylǵan órt sóndirý bóliminiń qyzmetkerleri Abylai Adashanov pen Ashat Smaǵulov jedel járdem kelgenge deiin oǵan alǵashqy meditsinalyq kómek kórsetti. Sodan soń 1958 jylǵy azamat aýrýhanaǵa jetkizildi», - delingen aqparatta.
Budan bólek, qutqarýshylar kópqabatty úiden 11 turǵyndy, onyń ishinde 1 balany evakýatsiialady. Kóp uzamai jalpy aýdany 25 sharshy metrge jetken qyzyl jalyn aýyzdyqtaldy. Órttiń shyǵý sebebi – temeki shegý kezinde qaýipsizdik talaptaryn saqtamaýdan bolýy múmkin.
