Foto: © Sputnik / Aleksandr Kriajev
Prokýratýra Ridder qalasyndaǵy jylý energiiasyn tutynýshylardyń quqyqtaryn qorǵady, dep habarlaidy "Ult aqparat" vedomstvonyń baspasóz qyzmetine silteme jasap.
Byltyr qarashada Ridderdegi jylý ortalyǵynda apat bolyp, bul jaǵdai jylý berýdiń tómendeýine alyp kelgen.
Shyǵys Qazaqstan oblysynyń prokýratýrasy qalyptasqan jaǵdaidyń sebepterin anyqtaý úshin ýákiletti organdardyń mamandarymen birlesip, kásiporyn qyzmetine tekserý júrgizgen.
"Onyń nátijeleri «Ridder JEO» AQ-nyń qanaǵattanarlyqsyz tehnikalyq jai-kúiin kórsetti. Zańnamalardy buzýdyń 240-tan astam deregi anyqtaldy.
Ýákiletti organdar prokýratýranyń qadaǵalaý aktileri boiynsha JEO-ǵa qatysty buzýshylyqtardy joiý týraly nusqama shyǵara otyryp, 11 mln.teńgeden astam somaǵa ákimshilik jaza qoldandy.
Prokýratýranyń usynysy boiynsha «Ridder JEO» AQ jylý energiiasyn tiisti deńgeide jetkizbegeni jáne sapasynyń nasharlaǵany úshin tólemdi qaita esepteý arqyly 63,3 mln.teńge somasyna 21,7 myń tutynýshyǵa zalal óteldi" - delingen habarlamada.
Budan basqa, tekserý barysynda 548 mln. teńge somasyna tariftik smeta men investitsiialyq baǵdarlamanyń qarajatyn maqsatsyz jumsaý týraly tabiǵi monopoliialar týraly zańnamany buzý faktisi anyqtalǵan.
«Ridder JEO» AQ úshin 2023 jylǵy 1 sáýirden bastap 2024 jylǵy 31 naýryzǵa deiin 18%-ǵa tómendetilgen ýaqytsha ótemdik tarif bekitilgen.
