Halyqaralyq frantsýz radiosy (RFI) Ortalyq Afrika respýblikasyndaǵy reseilik jaldamaly áskerdiń qatygez áreketteri jaily zertteý jariialady. Zertteýde qylmysqa kýá bolǵan ondaǵan adamnyń kýáligi de bar.
Másele Ortalyq Afrika respýblikasynda (OAR) úkimet armiiasy jaǵynda soǵysyp jatqan úsh áskeri top: "Vagner", Sewa Security Services jáne Lobaye Invest SARLU jóninde bolyp otyr. RFI málimetinshe, bul top músheleri beibit turǵyndardy azaptap, óltiredi, zorlyq-zombylyqpen, tonaýmen ainalysady.
Materialdaǵy negizgi aqparat kózi – BUU-nyń arnaiy jumys tobynyń Afrikadaǵy jaldamaly ásker jaily baiandamasy. Ondaǵy aqparatqa súiensek, biyldyń ózinde qańtar men sáýir aiynda reseilik áskeri qyzmetkerler 26 adamdy sotsyz darǵa asqan, 5 adamdy top bolyp zorlaǵan, 27 ret adamdardy zańsyz qamap, azaptaǵan.
Zertteýde birqatar qylmystar egjei-tegjeili baiandalady: qańtar aiynda azyq-túlik taýarlaryn tasymaldaǵan júk kóligin atqylaý kezinde úsh beibit turǵyn qaza bolǵan, aqpan aiynyń ortasynda úsh beibit turǵyn meshitte darǵa asylǵan, 25 aqpanda jergilikti turǵyn 24 jastaǵy áieldi áskeri top músheleri top bolyp zorlaǵan.
Reseidiń Ortalyq Afrikadaǵy elshiligi zertteýge qatysty túsinikteme bermedi. Biraq osyǵan deiin BUU-nyń jumys tobynyń baiandamasynda aitylǵan jaittardy "arandatý" dep ataǵan. Dipmissiia ókilderi sonymen birge BUU sarapshylary "bultartpaityn aiǵaq" keltirmedi dep sanaidy.
- Ortalyq Afrika respýblikasynda 2013 jyldan bastap ereýilshiler men bilik arasynda qarýly qaqtyǵys jalǵasyp keledi. Resei OAR prezidentine kómektesý úshin áskeri keńesshileri men jaldamaly áskeri qyzmetkerlerin jiberip otyrady. Batys aqparat quraldarynyń habarlaýynsha, onda reseilik jaldamalylardyń sany eki myńǵa jýyqtaýy múmkin. Olar úkimet armiiasy jaǵynda soǵysyp, strategiialyq nysandar men negizgi baqylaý pýnkterin kúzetedi. Al Kreml muny joqqa shyǵarady. Reseidiń OAR-daǵy elshisi onda 535 reseilik "instrýktor" baryn, biraq olardyń áskeri operatsiialarǵa qatyspaitynyn aitqan.
- 2018 jyly OAR-da úsh reseilik jýrnalist: Orhan Djemal, Aleksandr Rastorgýev jáne Kirill Radchenko óltirilgen. Olar reseilik jeke áskeri kompaniia "Vagner" jaily zertteý film túsirgen. "Vagner" – resmi emes reseilik áskeri jasaq, ol áskeri vedomstvolardyń tizimi men zańdyq tulǵalardyń reestrinde joq. Jýrnalistik zertteýlerge súiensek, top músheleri Siriiadaǵy operatsiialarǵa jáne Ýkraina shyǵysyndaǵy qaqtyǵystarǵa qatysqan. "Vagnerdi" Resei prezidenti Vladimir Pýtin ainalasynda júrgen kásipker Evgenii Prigojin qarjylandyrady dep aitylady.
- Resei tergeý komiteti "jýrnalisterdi arabtildi belgisiz qaraqshylar toby óltirýi múmkin" degen nusqany alǵa tartady. "Dose" táýelsiz zertteý ortalyǵy bul nusqany joqqa shyǵarady. Olardyń aitýynsha, "Vagner" basshylyǵymen bailanysty adamdar jýrnalister OAR-ǵa kelgennen keiin olardyń izine túsken. Zertteý toby jýrnalisterdiń ólimine osy toptyń qatysy bar dep sanaidy.
