Almaty qalasynyń Almaly aýdandyq sotynda zańger ári bloger Ádilethan Moldahanǵa qatysty qylmystyq is qaralyp jatyr. Ol QR Qylmystyq kodeksiniń 274-baby boiynsha kórineý jalǵan aqparat taratty dep aiyptalýda, dep habarlaidy ult.kz.
Kezekti sot otyrysynda jábirlenýshilerdiń biri, Almaty qalalyq politsiia departamenti Ákimshilik politsiia basqarmasynyń burynǵy basshysy Serik Shýmaev jaýap berdi. Onyń aitýynsha, Ál-Farabi dańǵylynda bolǵan jol-kólik oqiǵasy týraly alǵash ret kezekshi inspektordan habar alyp, oqiǵa ornyna barǵan.
«Birneshe kúnnen keiin Ádilethan Moldahan jariialaǵan beinejazba tarai bastady. Onda aitylǵan málimetterdiń maǵan esh qatysy joq jáne olar shyndyqqa sáikes kelmeidi», – dedi Shýmaev sotta.
Sondai-aq ol áleýmettik jelide taraǵan «yqpaldy adamdardyń balalaryna qamqorlyq jasady» degen aqparatty joqqa shyǵardy.
«Eshqandai “zolotaia molodejdi” qorǵaǵan emespin. Eger zań buzýshylyqqa jol bergen bolsam, Ishki qaýipsizdik qyzmeti tiisti shara qabyldar edi», – dedi burynǵy politsiia qyzmetkeri.
Shýmaev Ádilethan Moldahandy jeke tanymaitynyn, tek bloger retinde biletinin aitty. Ol ekinshi jábirlenýshi Erjan Uzabaevqa qatysty jariialanǵan málimetterdiń de shyndyqqa janaspaitynyn jetkizdi.
Sot barysynda «Sizge naqty qandai ziian keldi?» degen suraqqa jaýap bergen Serik Shýmaev qoǵamda týyndaǵan rezonanstan keiin qyzmetinen ketýge májbúr bolǵanyn jáne qazirgi ýaqytta jumyssyz ekenin málimdedi.
Aita keteiik, is boiynsha jábirlenýshiler retinde Almaty qalasy politsiia departamenti basshysynyń burynǵy orynbasary Erjan Uzabaev pen Ákimshilik politsiia basqarmasynyń burynǵy basshysy Serik Shýmaev tanylǵan.
Buǵan deiin jábirlenýshi tarap moraldyq shyǵyn retinde 10 million teńge jáne sot shyǵyndary úshin 1 million teńge kóleminde azamattyq talap-aryz bergen bolatyn.
