Reseidiń Arhangelsk oblysyndaǵy áskeri poligonda bolǵan apat iadrolyq otyn qoldanatyn zymyran dvigateliniń jarylýynan týyndaýy múmkin. Bul aqparatty amerikalyq sarapshylarǵa silteme jasaǵan Reuters agenttigi habarlady.
Sarapshylardyń boljamynsha, apat iadrolyq qondyrǵysy bar qanatty zymyrandy synaqtan ótkizý kezinde bolǵan. Bul qondyrǵy jaily ótken jyly Resei prezidenti Vladimir Pýtin aitqan. Resei bul zymyrandy 9M730 "Býrevestnik" dep atasa, NATO SSC-X-9 Skyfall dep ataidy.
Reseidiń qorǵanys ministrligi 8 tamyzda suiyq zymyran dvigatel qurylǵysyn synaqtan ótkizý kezinde eki áskeri qyzmetkerdiń qaza tapqanyn, alty adamnyń jaralanǵanyn málimdegen. Rosatom bes qyzmetkeriniń kóz jumǵanyn habarlady. Ministrlik dereginshe, apat kezinde aýaǵa ziiandy zattar taralmaǵan.
Amerikalyq ǵalymdar federatsiiasynyń ókili Ankita Panda sózine súiengen Reuters -diń jazýynsha, suiyq otyndy qoldanatyn zymyran dvigatelderinen radiatsiia bólinbeidi. Alaida agenttiktiń habarlaýynsha, poligonnan shamamen 30 shaqyrym jerde ornalasqan kórshi Severodvinsk qalasynyń resmi saity 8 tamyzda jarylystan soń qalada radiatsiia deńgeiiniń belgili bir ýaqyt aralyǵynda "qatty joǵarylaǵanyn" jazǵan. Biraq 9 tamyzda bul habarlama joiylǵan.
Middlberi halyqaralyq zertteýler institýtynyń ókili Djeffri Liýis Reuters agenttigine iadrolyq qondyrǵysy bar qanatty zymyrandy synaqtan ótkizý kezinde apat bolýy múmkin degen. Liýis pen institýt qyzmetkerleri poligonnyń spýtnikten túsirilgen sýretteri men janama derekterge súiene otyryp tujyrym jasaǵan.
Olar jarylys bolǵan kúni jaǵalaýdaǵy kemelerdiń avtomatty identifikatsiia júiesi (AIS ) signaldaryn zerttegen. Zertteý barysynda kemelerdiń biri "Serebrianka" teplohody ekeni anyqtalǵan. Bul - suiyq radioaktivti qaldyqtardy jinap, saqtaityn arnaiy keme. Liýistiń sózinshe, qarapaiym dvigateli bar zymyrandy synaqtan ótkizý úshin mundai kemeniń bolýy shart emes.
Buǵan qosa, Liýistiń aitýynsha, AIS signaldaryn zertteý nátijesi bóten kemelerdi jibermes úshin "Serebrianka" teplohodynyń jaǵalaýǵa synaq ótpei turyp bir ai buryn ornalasqanyn da kórsetken.
