Qytai bir top dárigerin Soltústik Koreiaǵa jiberdi. Bul týraly qupiia derekkózge súiengen Reuters agenttigi habarlady. Agenttiktiń jazýynsha, dárigerler sapary Soltústik Koreia jetekshisi Kim Chen Ynnyń dárigerler keńesine muqtajdyǵymen bailanysty bolýy múmkin.
Qytai dárigerleriniń sapary Soltústik Koreia basshysynyń densaýlyǵy týraly qarama-qaishy aqparattar taraǵan ýaqytpen tuspa-tus kelip otyr. Sáýir aiynyń ortasynda ońtústikkoreialyq basylym Kim Chen Ynnyń júregine operatsiia jasalǵanyn habarlaǵan. Alaida bul aqparat resmi túrde rastalmady.
Reuters-tiń Ońtústik Koreiadaǵy derekkóziniń aitýynsha, Kim Chen Yn tiri jáne jaqyn arada jurt aldyna shyǵýy múmkin. AQSh barlaý qyzmetine jaqyn derekkózi Kim Chen Ynnyń shynymen aýyrǵanyn rastady. Alaida Soltústik Koreia basshysynyń hali aýyr dep aitýǵa negiz joq.
AQSh memlekettik hatshysy Maik Pompeo jýrnalisterge ázirge Vashingtonda Kim Chen Ynnyń densaýlyǵy týraly aqparat joq, biraq jaǵdaidy muqiiat baqylap otyr dep aitty.
Sońǵy ret Soltústik Koreianyń aqparat quraldary Kim Chen Ynnyń qai jerde ekenin 11 sáýirde habarlaǵan. Alaida onyń 15 sáýir kúni atasy Kim Ir Senniń týǵan kúnine arnalǵan saltanatty sharaǵa qatysqany-qatyspaǵany belgisiz.
Reuters-diń jazýynsha, Kim Chen Ynnyń densaýlyǵy temeki tartý, artyq salmaq jáne júrek-qantamyr aýrýlaryna bailanysty nasharlaýy múmkin.
