Foto: THETRUMPET.COM
AQSh Ýkrainaǵa quny 2 mlrd dollar bolatyn jańa áskeri kómek paketin berýge daiyndalyp jatyr. Kómek paketine alǵash ret 150 shaqyrymǵa deiin ushatyn raketalar engizilgen, - dep jazdy Aq úidegi eki derekkózge súiengen Reuters basylymy.
Áńgime joǵary dáldikti GLSDB (Ground Launched Small Diameter Bomb) raketasy jóninde bolyp otyr. Qazir Ýkrainaǵa jetkizilip jatqan raketalar 80 shaqyrymǵa deiin usha alady.
Reuters Boeing kompaniiasy byltyr qarashada ózi óndiretin GLSDB qarýyn Ýkrainaǵa berýdi usynǵanyn habarlaǵan.
Júie raketaqozǵaltqyshy bar shaǵyn diametrli bombadan quralǵan. Ózdiginen dáldei alatyn raketany HIMARS qondyrǵysynan da ushyrýǵa bolady. Ol júrip bara jatqan nysanany ondaǵan shaqyrym jerden atyp túsire alady.
Júie sipattamasynda ony ǵalamdyq GPS navigatsiia júiesimen basqarýǵa bolatyny jazylǵan. Ony kez kelgen aýa raiynda iske qosýǵa bolady dep aitylady.
GBU-39 oqtumsyǵynyń jinala alatyn shaǵyn qanattary bar. Bul oǵan 100 shaqyrymnan asatyn qashyqtyqtaǵy nysanany kózdeýge múmkindik beredi.
Vashington Kievtiń 300 shaqyrymǵa deiin ushatyn raketalardy berý týraly usynysyn oryndamaǵan. Aq úi ýkrain áskeri olardy Resei aýmaǵyna soqqy jasaýǵa qoldanyp, soǵys ýshyǵyp kete me dep qaýiptenedi.
Buǵan deiin Ýkraina prezidenti keńsesiniń keńesshisi Mihail Podoliak Kiev Máskeý anneksiialap alǵan Qyrymdaǵy nysandarǵa shabýyl jasaýǵa múmkindik beretin raketalardy jetkizý jóninde kelissóz júrgizip jatqanyn aitqan.
Aqparatqa qaraǵanda, AQSh-tyń jańa áskeri paketinde Patriot pen Javelin-ge qajet qosymsha jabdyqtardy berý de qarastyrylǵan.
Reuters-tiń jazýynsha, bul kómekke qatysty resmi málimdeme osy aptada jasalady. Aq úi ázirshe túsinikteme berýden bas tartty.
AQSh, Eýropa elderi, Japoniia jáne Avstraliia Ýkrainaǵa ondaǵan milliard dollar kóleminde kómek bergen. Kómek berý jaǵynan birinshi orynda – AQSh, odan keiin Ulybritaniia, Germaniia, Kanada jáne Polsha tur.
