Respýblikalyq biýdjettiń shyǵystary 8 trln 136 mlrd teńgeni qurady. Bul týraly Úkimet otyrysynda biylǵy jeti aidyń qorytyndysy boiynsha biýdjettiń atqarylý jaiynda esep bergen QR Qarjy ministri Erulan Jamaýbaev málim etti, dep habarlaidy QazAqparat.
«Memlekettik biýdjettiń shyǵystary 98,6 paiyzǵa, respýblikalyq biýdjettiń shyǵystary - 99,1 paiyzǵa, jergilikti biýdjetterdiń shyǵystary 98,5 paiyzǵa atqaryldy. Respýblikalyq biýdjettiń shyǵystary 8 trln 136 mlrd teńgeni qurady. 74 mlrd teńgege atqarylmaǵan. Onyń ishinde únemdeý – 13 mlrd teńge, igerilmegeni – 61 mlrd teńge», - dedi ministr Úkimet otyrysynda.
Igerilmeýdiń negizgi sebepteri: konkýrstyq rásimderdi, sharttardy jasaý rásimderdi uzaq ótkizý, oryndalǵan jumystar aktilerin usynbaý, karantindik shekteýge bailanysty taýarlardy jetkizbeý.
Qarjy ministriniń aitýynsha, jergilikti biýdjetterdiń shyǵystary 4 trln 172 mlrd teńgeni qurady, 62 mlrd teńgege atqarylmaǵan.
«Biyl óńirlerge somasy 2,3 trln teńgege nysanaly transfertter kózdelgen. Aldyn ala derekter boiynsha 1 tamyzdaǵy kezeńde olarǵa 1,1 trln teńge bólindi. Onyń ishinde 98,3 paiyzy igerilgen. Atqarylmaǵany – 19 mlrd teńge. Onyń ishinde únemdeý – 4 mlrd teńge, igerilmegeni – 15 mlrd teńge», - dep túsindirdi E. Jamaýbaev.
