رەسپۋبليكالىق بيۋدجەتتٸڭ شىعىستارى 8 ترلن 136 ملرد تەڭگەنٸ قۇرادى. بۇل تۋرالى ٷكٸمەت وتىرىسىندا بيىلعى جەتٸ ايدىڭ قورىتىندىسى بويىنشا بيۋدجەتتٸڭ اتقارىلۋ جايىندا ەسەپ بەرگەن قر قارجى مينيسترٸ ەرۇلان جاماۋباەۆ مەلٸم ەتتٸ, دەپ حابارلايدى قازاقپارات.
«مەملەكەتتٸك بيۋدجەتتٸڭ شىعىستارى 98,6 پايىزعا, رەسپۋبليكالىق بيۋدجەتتٸڭ شىعىستارى - 99,1 پايىزعا, جەرگٸلٸكتٸ بيۋدجەتتەردٸڭ شىعىستارى 98,5 پايىزعا اتقارىلدى. رەسپۋبليكالىق بيۋدجەتتٸڭ شىعىستارى 8 ترلن 136 ملرد تەڭگەنٸ قۇرادى. 74 ملرد تەڭگەگە اتقارىلماعان. ونىڭ ٸشٸندە ٷنەمدەۋ – 13 ملرد تەڭگە, يگەرٸلمەگەنٸ – 61 ملرد تەڭگە», - دەدٸ مينيستر ٷكٸمەت وتىرىسىندا.
يگەرٸلمەۋدٸڭ نەگٸزگٸ سەبەپتەرٸ: كونكۋرستىق رەسٸمدەردٸ, شارتتاردى جاساۋ رەسٸمدەردٸ ۇزاق ٶتكٸزۋ, ورىندالعان جۇمىستار اكتٸلەرٸن ۇسىنباۋ, كارانتيندٸك شەكتەۋگە بايلانىستى تاۋارلاردى جەتكٸزبەۋ.
قارجى مينيسترٸنٸڭ ايتۋىنشا, جەرگٸلٸكتٸ بيۋدجەتتەردٸڭ شىعىستارى 4 ترلن 172 ملرد تەڭگەنٸ قۇرادى, 62 ملرد تەڭگەگە اتقارىلماعان.
«بيىل ٶڭٸرلەرگە سوماسى 2,3 ترلن تەڭگەگە نىسانالى ترانسفەرتتەر كٶزدەلگەن. الدىن الا دەرەكتەر بويىنشا 1 تامىزداعى كەزەڭدە ولارعا 1,1 ترلن تەڭگە بٶلٸندٸ. ونىڭ ٸشٸندە 98,3 پايىزى يگەرٸلگەن. اتقارىلماعانى – 19 ملرد تەڭگە. ونىڭ ٸشٸندە ٷنەمدەۋ – 4 ملرد تەڭگە, يگەرٸلمەگەنٸ – 15 ملرد تەڭگە», - دەپ تٷسٸندٸردٸ ە. جاماۋباەۆ.
