Eldi meken aýmaqtarynda qurǵaq shópterdiń órtenýi asa alańdatady. Bul týraly Ortalyq kommýnikatsiialar qyzmetinde ótken brifingide QR Tótenshe jaǵdailar ministrliginiń Órtke qarsy qyzmet komitetiniń tóraǵasy Nurbolat Derbisov aitty, dep habarlaidy QazAqparat.
«Eldi meken aýmaqtarynda qurǵaq shópterdiń órtenýi alańdatady, óitkeni onyń jalyny turǵyndardyń aýmaǵyna ótip ketý qaýpi bar. 2021 jylǵy 26 sáýir men 3 mamyr aralyǵynda qurǵaq shóptiń órtenýi turǵyn úilerge, jazǵy saýyqtyrý lagerleriniń ǵimarattaryna, saiajai jáne sharýashylyq qurylystaryna taralýynyń 4 jaǵdaiy tirkeldi», - deidi Órtke qarsy qyzmet komitetiniń tóraǵasy Nurbolat Derbisov.
Onyń aitýynsha, biyl 1-2 mamyrda Pavlodar qalasynda baý-baqsha jáne saiajai aýmaqtarynda qurǵaq shóptiń janýynyń 2 oqiǵasy tirkeldi.
«Nátijesinde 5 saiajai tolyǵymen joiylyp, 7 saiajai jartylai zaqymdaldy. Biylǵy jylǵy 2 mamyrda Soltústik Qazaqstan oblysynyń Jeliakovo aýylynda qurǵaq shóp órtenip, keiin jalyn jeke turǵyn úi sektoryndaǵy 6 úige taraldy, sol kúni Qyzyljar aýdanyndaǵy «Sosnovyi bor» balalar saýyqtyrý lageriniń aýmaǵynda qurǵaq shóp órtenip, keiinnen jalyn demalýshylar turatyn korpýsqa ótti. 2 mamyrda Nur-Sultan qalasyndaǵy Saryarqa aýdanynda qurǵaq shóp órtenip, jalyn turǵyn úige taralǵan, sondai-aq órttiń saldarynan jeńil avtokólik janyp ketti», - deidi ol.
Aita ketý kerek, orman jáne dala órtteriniń kóp bóligi 100 km-den astam radiýsta, TJM bólimsheleri joq shalǵai aýmaqtarda oryn alady.
