Respýblika sottary 10-11 qańtarda sailaý isteri boiynsha barlyǵy 2 ótinishti qarady. Bul týraly óziniń Facebook paraqshasynda QR Joǵarǵy sotynyń baspasóz hatshysy Aidos Sádýaqasov málim etti, dep habarlaidy "Ult aqparat".
Onyń aitýynsha, respýblika sottary 2021 jyldyń 10-11 qańtarynda ýchaskelik sailaý komissiialarynyń (ÝSK) sheshimderi men áreketterine shaǵymdanýǵa qatysty 2 ótinishti máni boiynsha qarap, sheshim qabyldady. Eki isti de Almaty sottary qarady.
«Táýelsiz baiqaýshylar» qoǵamdyq birlestigi Medeý aýdandyq sotyna júgine otyryp, baqylaýshysyn tirkeýden bas tartqany jáne sailaý ýchaskesine kirýge ruqsat bermegeni úshin ÝSK-niń áreketin zańsyz dep tanýdy jáne baqylaýshy retinde tirkeýge mindetteýdi surady.
«Sailaý týraly» zań baqylaýshydan ókilettigin jazbasha rastaýdy talap etedi. Bul qujat baiqaýshynyń tegin, atyn, ákesiniń atyn kórsete otyryp usynǵan uiymnyń mórimen bekitilýi tiis. Buǵan qosa, baiqaýshy jeke kýáligin kórsetýge mindetti. Osy talaptardyń barlyǵyn baiqaýshy bolýǵa tilek bildirgen tulǵa oryndamaǵan. Sol sebepti sot qoǵamdyq birlestiktiń talaptaryn qanaǵattandyrýdan bas tartty.
Dál osyndai ótinishpen №2 Almaly aýdandyq sotyna «Qazaqstannyń jastar aqparattyq qyzmeti» qoǵamdyq qorynyń ókilderi de júgindi. Onda qoǵamdyq qor óz ókiliniń sailaý ýchaskesiniń ǵimaratynda bos oryndardyń bolmaýyna bailanysty baqylaýshy retinde kirgizilmegendigin atap kórsetken. Qoǵamdyq qor sanitarlyq talaptardy saqtaýǵa bailanysty siltemelerdi negizsiz dep eseptedi.
ÝSK ókili sailaý ýchaskesiniń ǵimaratyndaǵy baiqaýshylarǵa bólingen orynnyń bosaǵanyn kúte turý týraly ótinishti ony kirgizýden jáne tirkeýden bas tartý bolyp tabylmaityndyǵyn atap ótti.
Sot anyqtaǵandai, ÝSK ǵimaratynda qoǵamdyq baiqaýshylarǵa bólingen oryndar sanitarlyq normalar men COVID-19-dyń taralýynyń aldyn alý jónindegi algoritmge sáikes ornalastyrylǵan.
Ýchaskege kelgen sátte baiqaýshyǵa oryn usyný kezinde áleýmettik qashyqtyq normalaryn saqtaý múmkin bolmady.
«Halyqtyń densaýlyǵy jáne densaýlyq saqtaý júiesi týraly» kodeks talaptary men joǵaryda atalǵan algoritmdi bekitý týraly Bas sanitarlyq dáriger qaýlysynyń normalary mindetti túrde oryndalýy tiis. Osyǵan bailanysty sot qoǵamdyq qordyń talabyn oryndaýdan bas tartty. Ótinishterdiń birqatary ótinish berýshilerdiń zań talaptaryn saqtamaýyna orai keri qaitaryldy. Atap aitqanda, olarda ÝSK-ge qoiylatyn naqty talaptar men zańnyń qandai normalary buzylǵany kórsetilmegen»,-delingen Joǵarǵy Sot janyndaǵy Sottardyń qyzmetin qamtamasyz etý departamentiniń málimetteri negizinde qaldyrylǵan habarlamada.
