Astana mektepterinde bitirý keshteri qarsańynda aqsha jinalyp jatqan joq. Bul týraly Qazaqstannyń Bilim jáne ǵylym ministrliginiń ókilderi málimdedi, - dep habarlaidy "Ult aqparat" kaz.tengrinews.kz portalyna silteme jasap.
"2016-2017 oqý jylynyń basynda respýblikanyń barlyq mektebinde, sonyń ishinde Astana mektepterinde qarajat jinaýǵa tyiym salý týraly buiryq shyqty. Bul buiryqty barlyq mektep jetekshileri men muǵalimder oryndaýy tiis. Bul buiryqty oryndamaǵandar ákimshilik jazaǵa tartylady", - dep habarlady QR Bilim jáne ǵylym ministrliginiń baspasóz hatshysy Arman Júnisov OKQ brifinginde.
Ol attestat tapsyrý boiynsha saltanatty bitirý keshteri mektep qabyrǵasynda ótýi tiis ekenin eske saldy.
"Sondyqtan ministrlik barlyq bitirý keshin mektep qabyrǵasynda ótkizýge keńes beredi. Ministrlik osyǵan bailanysty barlyq mektepke jadynama joldady. Astana qalasy Bilim basqarmasynyń málimetinshe, qala mektepterinde aqsha jinalyp jatqan joq", - dedi QR BǴM ókili.
Onyń aitýynsha, mektepterde aqsha jinaý deregi anyqtalǵan jaǵdaida Bilim jáne ǵylym ministrligine habarlasý kerek. "Baspasóz qyzmetine, bizge hat jazýyńyzǵa nemese telefon soǵýyńyzǵa bolady. Qalanyń, aýdandardyń bilim basqarmalaryna habarlasyp, osyndai derek tirkelgen jaǵdaida, ainalysamyz", - dedi Júnisov.
