«Gold Sompany LTD» degen ataýmen qarjy piramidasyn quryp, turǵyndarǵa 10 mlrd teńge shyǵyn keltirgen topqa qatysty sot úkimi shyqty. Olar 6 jyldan 12 jylǵa deiin bas bostandyǵynan aiyryldy, dep habarlaidy QazAqparat.
Is 2021 jyly sotqa túsip, onda Resei azamattary Pavel Litvinenko, Iýrii Moskvin jáne Aqtóbe qalasynyń turǵyny Ravil Qazybaevqa Qylmystyq kodekstiń «Uiymdasqan top, qylmystyq uiym qurý jáne olarǵa basshylyq etý, sol siiaqty olarǵa qatysý», «Qarjylyq (investitsiialyq) piramidany qurý jáne oǵan basshylyq etý» baptary boiynsha aiyp taǵyldy.
Is materialyna súiensek, Pavel Litvinenko, Iýrii Moskvin jáne Ravil Qazybaev 2019 jyldyń qazan aiy men 2020 jyldyń aqpan aiy aralyǵynda qarjylyq qylmys jasaǵan.
Pavel Litvinenko uzaq jyldar boiy túrli jelilik marketing arqyly satý-satyp alýmen ainalysyp, tájiribe jinaǵan. Sol qabiletin alǵa tartyp, ózgelerdi aldap-arbaý jolyn oilastyryp, qarjy piramidasyn qurdy. Sóitip 2019 jyly JShS-in zańdastyrdy. Adamdardy kanadalyq «ASHLY» kompaniiasyna investitsiia salýǵa úgittedi. Ol investitsiia salýdyń 7 jolyn usynǵan. Eń tómengi baǵa 300 myń teńge bolsa, eń kóbi 10 mln teńge dep belgilengen. Osylaisha adamdarǵa 10 mlrd teńgeden astam shyǵyn keldirdi. Sottalýshylar shyǵynnyń kóp bóligin ótegenimen, áli de 2,4 mlrd teńgeni qaitarýy tiis.
Aqtóbe qalalyq №2 sotynda qaralǵan qylmystyq iske úkim shyqty. Pavel Litvinenko 12 jylǵa bas bostandyǵynan aiyryldy. Ol 7 jyl boiy kommertsiialyq jáne qarjylyq uiymdarda basshylyq qyzmet atqara almaidy. Iýrii Moskvin 9 jylǵa, al Ravil Qazybaev 6 jylǵa bas bostandyǵynan aiyryldy. Olar jazasyn qaýiptiligi ortasha túzetý mekemesinde óteidi. Sonymen birge úsh sottalýshy jábirlenýshilerdiń shyǵynyn tolyq óteýi tiis. Jábirlenýshilerdiń kóbi 300 myń teńge aqshasyn senip berse, keibiri 4-10 mln teńgesin aýdarǵan.
Sot úkimi zańdy kúshine engen joq.
