Reseige salynǵan sanktsiialarǵa bailanysty QR Úkimeti halyqaralyq saýda brendteriniń keńselerimen ózara is-qimyl jasaý boiynsha jumysty bastady. Bul QR Premer-Ministri Álihan Smaiylov Májilis ókilderiniń depýtattyq saýalyna joldaǵan jaýabynda málim etti, dep habarlaidy QazAqparat.
«Búgingi tańda 300-ge jýyq halyqaralyq kompaniia ekonomikanyń barlyq salalarynda ózderiniń Resei naryǵynan ketetinin nemese investitsiiasyn, taýarlardy jetkizýin nemese basqa qyzmetin shekteitinin málimdedi. Bul rette taýarlardyń keń spektri Qazaqstanǵa sheteldik kompaniialardyń Reseide ornalasqan distribiýtorlary arqyly jetkiziledi. Qazaqstan biznes júrgizýdiń kóptegen mańyzdy tustary boiynsha (turaqty bank júiesi, biznes pen investorlardy memlekettik qoldaý sharalary, qolaily salyq salý jáne t.b.) sheteldik kompaniialarǵa qyzyqty bolýy múmkin. Osyǵan bailanysty Úkimet olardyń Ortalyq Aziia jáne TMD óńirindegi jumys strategiiasyn túsiný úshin osy kompaniialardyń keńselerimen ózara is-qimyl jasaý boiynsha jumysty bastady», - dep jazylǵan Úkimet basshysynyń jaýabynda.
Onyń málimeti boiynsha, iri halyqaralyq kompaniialardyń kóshýi úshin búkil uiymdastyrýshylyq jáne zańnamalyq máselelerdi egjei-tegjeili pysyqtaý qajet.
«Osy baǵyttaǵy jumystar jalǵasady», - dep jazady Úkimet basshysy.
Aita keteiik, Grýziia, Ázerbaijan, Túrkiia jáne Qazaqstan arasyndaǵy Middle Corridor birlesken kásiporny ázirlenip jatyr. Ol 2023 jyldyń basynda nemese ortasynda resmi túrde daiyn bolýy múmkin.
