"Resei men Qazaqstan jalpy básekege qabilettilikti arttyrý úshin kúsh biriktirýi tiis, kórshi respýblikadan talanttardy tartýdyń qajeti joq", dep málimdedi Resei Prezidenti Vladimir Pýtin Oral federaldy ýniversitetiniń stýdentterimen kezdesýde.
Kezdesý barysynda Resei basshysy talantty stýdentterge arnalǵan birlesken reseilik-qazaqstandyq granttar týraly suraqqa jaýap berdi, dep habarlaidy Sputnik agenttigi RIA Novosti-ǵa silteme jasap.
"Men talantty adamdardy Reseige tartý kerek dep aityp júrmin, shynymen de, solai isteý kerek, biraq Qazaqstannan emes. Nege? Sebebi, bizde Qazaqstan sekildi elderge qatysty basqa mindet bolýy tiis: kúsh biriktirýimiz kerek. Reseide neǵurlym tiimdi damyp jatsa – Reseide damytý kerek, Qazaqstanda neǵurlym tiimdi jumys istep jatsa – Qazaqstanda jasalýy kerek. Memleketaralyq qarym-qatynastar aiasynda kúsh biriktirý mańyzdy", - dedi Pýtin.
Resei prezidenti sondai-aq elde 70 myńǵa jýyq qazaqstandyq stýdent oqyp jatqanyn atap ótti.
"Ótken jyldyń ózinde, menińshe, 150 adam biýdjettik negizde, iaǵni reseilik biýdjet qarajaty esebinen qabyldandy, alaida Qazaqstan siiaqty elderde óz ónerkásibimizdi, óz ǵylymymyzdy damytýymyz qajet. Osy bazada jalpy básekege qabilettilikti arttyrý kerek. Eger birlesken granttarǵa qol jetkize alsaq, tipti jaqsy bolady. Ázirge alǵashqy qadam jasaldy, men tipti eki taraptan da granttar beriletinin bilmedim. Degenmen eger jalpy granttar bolsa, tipti jaqsy bolady, bizdiń aldymyzda turǵan ortaq maqsattarymyz jaily aityp turmyn", - dep tolyqtyrdy Pýtin.
Esterińizge sala keteiik, Qasym-Jomart Toqaev prezident retinde Máskeýge alǵashqy resmi saparmen barǵan kezde, Resei men Qazaqstannyń basshylary qoldanbaly ǵylymdardyń birlesken oqý ornyn ashýdy talqylady. Keiinirek Nur-Sultandaǵy Resei ǵylym jáne mádeniet ortalyǵynyń basshysy Konstantin Vorobev elordanyń joǵary oqý oryndarynyń biriniń bazasynda atalǵan joǵarǵy oqý ornyn ashý boiynsha kelissózder júrgizilgenin habarlady.
