Reseidiń Qara teńiz flotynyń flagmany sanalatyn "Moskva" zymyrandyq kreiseri teńizge batyp ketti. Bul týraly Resei Federatsiiasynyń Qorǵanys ministrligi málimdedi, - dep habarlaidy Tengrinews.kz.
Vedomstvo málimetinshe, "oq-dáriler jarylýynan órt kezinde korpýs zaqymdalýyna bailanysty" keme bir orynda tura almai, ony súireý kezinde "daýyldy teńiz jaǵdaiynda" batyp ketken. Buǵan deiin RF Qorǵanys ministrligi kreiser ekipajy aimaqta bolǵan flot kemelerine evakýatsiialanǵanyn habarlaǵan.
14 sáýirge qaraǵan túni Resei qorǵanys ministrligi "Moskva" kreiserinde bastalǵan órt saldarynan oq-dáriler jarylǵanyn habarlaǵan. Vedomstvo ekipaj tolyq evakýatsiialanǵanyn, negizgi zymyrandyq jabdyqtar zaqymdanbaǵanyn málimdegen. Artynsha órt aýyzdyqtalǵannan keiin keme júze alatyny aitylǵan edi.
Al Kiev kreiserge ýkrainalyq eki "Neptýn" zymyrany atylǵanyn habarlaǵan.
DW málimetinshe, Resei Qara teńiz flotynyń flagmany "Moskva" zymyrandyq kreiseri 1979 jyly teńizge jiberilgen. Onyń qarý-jaraqtarynyń arasynda radiýsy keminde 700 shaqyrymǵa jetetin "Výlkan" kesheniniń kemege qarsy 16 zymyrany, "Fort" alysqa atatyn keshenderi bolǵan.
Forbes málimetinshe, bul - Reseidiń Ýkrainamen soǵysyndaǵy eń qymbat áskeri shyǵyny. "Moskva" kreiseriniń boljamdy quny - 750 million dollar.
Ýkraina basylymdarynyń habarlaýynsha, "Moskva" kreiseri Odessa oblysy Zmeinyi aralyna shabýylǵa qatysqan.
