© instagram/maxgalkinru
Bir ai buryn áieli Alla Pýgachevamen jáne balalarymen Izrailge kóship ketken reseilik ázilkesh ári telejúrgizýshi Maksim Galkin alǵash ret Instagram-paraqshasynda bailanysqa shyqty, - dep habarlaidy Tengrinews.kz tilshisi.
Shoýmen naýryzdyń basynan beri áleýmettik jelilerdi júrgizýdi, oqyrmandarymen óz ómirindegi oqiǵalardy bólisýdi toqtatty. Jelide erli-zaiypty Máskeýge oralǵysy kelmeitini, azamattyǵyn ózgertýdi josparlap otyrǵany týraly qaýeset tarai bastady.
Osy aqparattarǵa pikir bildirý úshin ázilkesh video jariialady. Ol áleýmettik jelilerde ázirshe jańa videolar kútýdiń qajeti joǵyn aitty.
"Qurmetti oqyrmandarym balalarmen kúlkili videolar júktep, áleýmettik jelilerdi burynǵydai júrgizýimdi suraidy. Bulai jasaýdyń eshqandai rýhani jáne moraldyq múmkindigin kórip turǵan joqpyn. Sondyqtan áleýmettik jelilerim burynǵydai, 24 aqpanǵa deiingidei bolmaidy", - dedi Galkin.
"Men jáne meniń otbasym týraly barlyq qaýesetke, haipqa, jaǵymsyz aqparatqa keletin bolsaq, "tańerteń keńes gazetterin oqymańyzdar" der edim. Munyń bári bos sóz, oǵan jaýap berýdiń keregi joq dep sanaimyn. Túsingenderińizge raqmet", - dedi ol.
Sondai-aq, ol Stories-te maýsymda ótetin kontsertteri týraly aqparatty jariialady. Biraq olar Izrailde ótedi.
24 aqpanda Maksim Galkin Ýkrainadaǵy qaqtyǵys týraly pikir bildirdi.
"Ne sezinetinimdi sózben aityp jetkizý múmkin emes! Qalai? Soǵysty aqtaityndai sebep joq!" - dep jazdy ol Instagram-da.
Galkin óz ustanymyn aitqannan keiin federaldy telearnalar ázilkesh túsken "Ýralsib" bankiniń jarnamasyn efirden alyp tastaǵan. Sonymen qatar, ártistiń Reseidiń túrli qalasyndaǵy kontsertteri toqtatylǵan.
