Kreml synshysy Aleksei Navalnyidy bosatýdy talap etken mitingiler kezinde ustalǵany rastalǵandar sany 3642-ge jetti. Bul týraly "OVD-Info" basylymy habarlady.
Basylymnyń málimetinshe, ustalǵandardyń kóbi Máskeý (1439) men Sankt-Peterbýrg (545) úlesinde. Qazanda - 117, Novosibirskide - 98, Voronejde - 95, Nijnii Novgorodta - 90, Habarovskte 65 adamnyń ustalǵany anyqtalǵan.
Basylym ustalǵandar sanyn jii jańartyp jatyr. Soǵan qaraǵanda bul aqyrǵy san bolmaýy yqtimal.
23 qańtar kúni Reseidiń júzdegen qalasynda oppozitsiialyq saiasatker Aleksei Navalnyidy bosatýdy talap etken narazylyq aktsiialary ótti.
Navalnyi 17 qańtar kúni Berlinnen Máskeýge oralǵan boida qamaýǵa alynǵan. 18 qańtar kúni Máskeý soty ony 30 táýlikke qamaý týraly úkim shyǵardy. Osy merzim aralyǵynda onyń shartty jazasyn qamaýǵa aýystyrý týraly otyrys ótýi kerek. Áńgime 2014 jylǵy "Iv Roshe" isi jónindegi sot sheshimi tóńireginde bolyp otyr. Navalnyi jaqtastary shartty jazanyń ótken jyldyń sońynda aiaqtalǵanyn aitady.
23 qańtar kúni bolǵan mitingilerge Navalnyidyń ózi shaqyrǵan. Ol bul úndeýin 18 qańtar kúngi sot otyrysynyń aldynda joldaǵan. Keiinirek onyń shtaby naqty kúndi habarlady.
Miting kúni jáne onyń qarsańynda Resei biligi Navalnyi jaqtastaryn ustap, tintip, olarǵa degen qysymdy kúsheitti.
44-jastaǵy Navalnyi Resei prezidenti Vladimir Pýtinniń eń basty qarsylasy sanalady. Ótken jyly tamyz aiynda oppozitsiialyq saiasatker Tomskiden Máskeýge ushyp bara jatyp, esinen tanyp qaldy. Eki kúnnen soń es-tússiz kúii Germaniiaǵa jetkizilgen Navalnyi Máskeýge oralǵanǵa deiin sol emdelgen. Germaniia úkimeti Navalnyidyń "Novichok" deitin júike júiesin sal etetin ýmen ýlanǵanyn málimdedi. Ony resmi Berlinniń ótinishimen bólek taldaý júrgizgen úsh táýelsiz zerthana rastaǵan.
Navalnyi qamaýǵa alynǵannan eki kún ótken soń onyń shtaby "Pýtinniń saraiy" deitin eki saǵattyq zertteý filmin jariialady. Youtube jelisinde jariialanǵan zertteý osy ýaqytqa deiin 77 million kórilim jinap úlgergen.
